忘記了誰說過，從前的兒童沒有玩具，只好想像，然後自製。哪個70後沒有玩過丫叉、雪條棍、彈弓刀？時代不同，從前的人玩模型，多少有創作成份，今天的Figure迷花錢就好了，然後一個變兩個，再變十個。香港的Figure水準世界第一，香港的Figure迷更不易服侍！
記者：何兆彬
攝影：伍慶泉
當它們是藝術品
PeterPaul加入Figure世界的經驗，是典型港人例子：「記得好細個，我玩超合金玩具時就話：點解啲手手腳腳咁硬直？咁唔認真？點解唔出一啲可以郁動的關節？細個玩高達呀等等日本玩具，後來01年Medicom推出幪面超人一號，賣$6××，當年覺得好貴，家就覺得平！我鍾意Figure，但以前我唔玩人形，因為唔想畀人感覺係咁玩具，後來Figure越出越靚，我當佢係藝術品多一些。」SumSum：「我細個乜玩具都玩，認真玩12吋是近兩三年的事。以前在加拿大讀書，最記得係放假同班同學去玩具反斗城掃Spawn6吋半Figure！（做學生都有錢掃？）係，好瘋狂。後來畢業返港，見到六百幾蚊一隻Figure，覺得好荒謬，用現在水平看，當然係好平好平！08年我見到第一個BatmanDarkKnight賣$980，掙扎咗好耐，買咗以後，好鍾意佢好精細；到09年最失控，試過一個月買了八隻，見到靚的好想好想要，上網見到又Bid晒返來。」他分析：「我覺得呢兩件係被電影所吸引，以往的Figure都係軍事、士兵，但現在勁出電影英雄。小時候父母不理我，任我看很多暴力血腥電影，最記得表哥會帶埋我去睇史泰龍同《星戰》，搞到呢啲戲入晒腦！」PeterPaul：「呢幾年的Figure真係好Detail，我只可以用Art來形容。」人偶會其中一個成員，不願上鏡的Henry說：「我只有很少12吋Figure，最愛玩美國Figure，因為價錢平，活動能力大，你可以任意的扭動它，不會就住就住。」
Figure變炒賣工具
Figure迷玩Figure，其實各師各法。SumSum：「我真係會拆佢出來，扭佢關節，擺甫士影相，玩過先知件Figure出得好唔好。我哋唔同出面有些論壇，講了半天都在講呢個Figure炒唔炒得起，有無人派貨。我哋真係玩家。」原來近兩年香港Figure冒起，也引來炒家入場，令炒價高升，甚至有人聘請年輕人做排隊黨，真正的玩家自然不滿，「當Figure唔再係Figure，變成了一件炒賣工具，令我哋買唔到心目中的玩具，就有問題。今年動漫節HotToys推出限量版Predators，只有500隻，必須排隊，但是有舖頭請後生仔去排，每人$300即場畀錢，結果一隻$1,280的Figure轉手賣四千幾蚊，真可怕！排隊當晚還出現打尖，我朋友去瞓咗一晚，點知醒來發現前面多了百幾人！最後買不到Figure。」他們說：「我們明白公司是想造勢，但結果人群把在場1:1的WarMachine推跌了，本來分幾日賣的限量Figure，一天就賣光了。我們好失望，排隊在日本常有，永遠不需要鐵欄，好有秩序，但香港就算有鐵欄都有人打尖。」那這種情形怎樣解決？Henry：「我剛剛去了美國聖地牙哥的動漫展，他們的做法，是分多日賣，而且拿了籌，排到隊，還要抽籤！抽到黃波就有得買，抽到白波就拜拜，你可以說這樣不公平，但這就杜絕了排隊黨。」
人偶會珍藏
港出品佔世界龍頭
「香港無疑在世界Figure界佔據龍頭位置。」人偶會總會長Gary說。Figure迷分析，如今世界Figure龍頭公司，主要有四間，當中有香港的HotToys、Enterbay、日本的Medicom及美國的Sideshow。作為長期消費者，且聽他們評一評其中最常光顧的三家。
HotToys水準高
「講製作水平，的確是龍頭位置。HotToys的Body做得好，而且不時會修改，可見越出越好。要彈，就係他們的售後服務做得比售前好。售前是預訂，每個員工說的都不一樣，而且總是低着頭回答你，總不會望着顧客說話的！售後是你訂了Figure，去檢驗收貨，事實上他們的製作水準是很穩定的。」
Enterbay不穩定
「講到HotToys，會一齊講的自然又有Enterbay，Enterbay以李小龍最為著名，《風雲》電影亦出得好神似，但係Enterbay個Body時常出現問題。例如《葉問》甄子丹，手太幼、A字膊，而且大髀關節擺甫士一扭，竟然甩出來，但之後出的《風雲》又沒有這問題，這是水準不夠穩定之故。簡而言之，他們將一切資源都放了上Figure個臉上，其他部份有時做得不盡令人滿意。上色的水平有時也不穩定，例如葉問，我揀了三十幾盒才畀錢買這一盒！不過Enterbay的售前、售後服務都要讚，那位女士的態度十分好，開幾十盒來揀都沒有黑面，令你說話不期然會溫柔一點。」
Medicom贏獨家
「我真係唔想再幫襯Medicom了。」PeterPaul說：「質素沒有進步，但價錢一直加，當然日圓升值都係其中一個因素。買Medicom的原因，是他們的東西是獨家的，例如幪面超人，絕不會讓香港公司出的。」
Sideshow美國貨
花錢事小眾叛事大
人偶會的會員，隨便找一個玩了兩年的，都有近百隻Figure，計一計數，數目不少，「計$1,000一隻，100隻就是十萬元了。」他們稱得上迷，當然還有很多錢要花，例如訂做Figure櫃，又例如有時買Figure回來，因有兩個頭兩套衫，他們就會另外買一個身體，結果由一個變成兩個，「不過像《未來戰士》T-1000，我多買了個Body，但係爭條皮帶，就要另外再買。外間的店舖會將Figure拆開來賣，當然只買一個部件就較貴，例如一條皮帶要$100。」
這種花錢方法，家人女友自然不會贊成，「有個朋友騙女朋友，說每個只是幾百元，他從來不敢在女友面前看《Milk》（每期有篇幅介紹Figure），但有一次女友在醫務所看到了，結果……」PeterPaul：「當初我爸找風水師來，那個風水師說我的幪面超人不利風水！激得我呀，我把Figure都放入房中，自然不會理他。」SumSum：「我媽說，鐵血戰士一類醜怪到呢，不能放廳，其他倒沒有意見。但每次有親戚來訪，她就會打開我房門，叫人來欣賞一下。」說到這裏他帶點激動：「最怕就係小朋友來訪，他們總是說要玩這個玩那個，這些是我身家性命，自然不許。有一次我就快手拿了幾隻《變形金剛》，帶他們出廳玩，然後關門！」Figure是寶貝，最怕「第三者」，包括阿媽，PeterPaul：「有一天我回到家中，發現幪面超人中最罕有的一隻，頭上兩隻角竟然有一隻變成了大頭針！我馬上問我媽發生甚麼事，她說，有一隻角不見了，只好找大頭針代替！好彩我盒中是有額外的角附送咋！」
