林嘉欣一向敢作敢為，最近突然爆出6月喺加拿大嫁畀導演男友袁劍偉，家仲已經有咗大約6個月BB，身為嘉欣契媽嘅潘迪華係唯一一位圈中人有份到加拿大出席婚禮，可見嘉欣同潘迪華感情真係好好，同親生媽咪都冇乜分別。噚日潘迪華接受商台電話訪問，仲講到嘉欣陀住BB嘅近況。
上待產課
潘迪華話：「佢家陀BB陀得好好，仲日日去游水，另外佢又去上待產課程，做足預備功課，家佢真係好開心幸褔。」但係嘉欣之前被人傳係第三者，身為契媽嘅潘迪華挺身而出為佢澄清話：「佢哋聽到呢啲新聞都覺得好無奈，其實處理上係有少少唔好，如果一早公開就冇事。」不過潘迪華都明白嘉欣有合約在身，所以要拍晒手頭上嘅戲先可以結婚，先至迫於無奈唔可以第一時間公佈喜訊。
問到嘉欣生完BB會唔會返香港再拍戲？潘迪華就話：「佢好鍾意拍戲，但係我同袁生就唔係咁想佢返嚟喇。」至於講到同嘉欣嘅契母女情，潘迪華話嘉欣一共有四姊妹，由於同嘉欣好投契，所以主動同林媽媽講可唔可以分半個女畀佢，雖然已經係契媽同契女關係，但嘉欣依然叫潘迪華做潘姐姐o架。