自由黨下月舉行常委前夕，忽然傳嚟張宇人會退任副主席消息，原因係為免廿蚊張事件影響區議會選情，所以由田二少接棒頂上云云。田二少接班眾所周知，但原來唔係要張宇人退位讓賢，自由黨主席劉健儀噚日透露該黨正研究修改黨章，建議增加多一個副主席至三個，而佢已經打探過田二少口風，知道佢對做副主席「有興趣」。
參加直選蓄勢待發
田二少下屆喺新界西參加直選蓄勢待發，度身訂做又好，黃袍加身又好，做副主席眾望所歸。公務在身嘅田二少身在歐洲，無法直接回應係咪會做副主席，張宇人則同八方講，佢至今冇提出退任副主席，但若果有人係有心又有力，佢當然好支持。
查實張宇人喺08年自由黨樹倒猢猻散之際，臨時拉伕做副主席，佢話上任至今都唔知道呢個位原來有任期o架噃。佢同八方申明，接任時已經同前主席田少君子協定，下屆改選後唔做黨務，只想專注業界同自己生意。至於係咪因為廿蚊張事件被個黨離棄，張宇人強調絕無此事，自由黨會繼續搵港大就最低工資做民調，研究邊個水平殺傷力冇咁大。