坐擁多名港腳嘅南華足主羅傑承，周一喺球會方部落連環出招，話港亞運隊下個月初去高雄參加4角邀請賽，到時世界排名133位嘅香港會對住排名仲低嘅菲律賓、中華台北同澳門3隊業餘隊練兵，因此要叫停聯賽兩個禮拜，質疑對準備11月亞運有乜幫助，亦懷疑成效。
發表「食快餐」妙論
呢段甚有味道嘅部落出街之後，即惹來球圈熱烈討論，有球迷撐羅生，話港隊話晒都掛住職業聯賽個名，同菲律賓同中華台北呢啲業餘隊拍跳，就算贏咗都練唔到啲乜；亦有球迷話賽前同較弱對手熱身之餘，球員有機會集埋一齊去備戰屬好事，球會應該支持。
我求大俠睇完兩方嘅論點，覺得各有道理，但賽前同啲弱隊拍跳，令球員有多啲信心，在國際球壇亦經常見到，點知球迷越討論就越激，而羅生見大家咁熱烈，噚晚提早出blog，以「食快餐」回應球迷嘅討論：「感覺是，今次足總是有更多時間去籌備煮餐好飯餸了，有點期待，但煮出來都是要大家『食快餐』，所以我才提出來講。」佢仲意猶未盡講，呢段時間卡塔爾同印度都約緊友賽，而印尼、越南、新加坡和泰國亦唔難約到；可能香港足球或者習慣「好又一餐，唔好又一餐」太久，但佢向來有要求，今次先攞出嚟講啫！
曾偉忠諗到鬚白晒
雖然羅生唔滿意港隊去高雄同啲業餘隊拍跳，但「南、飛」系球員噚日如常出席港隊操練，只係陳肇麒、郭建邦同張春暉等稱傷到場齋坐；做咗港隊教練幾個月嘅曾偉忠，喺開操前被追問手握重兵嘅羅生唔贊成港隊同啲咁渣對手踢波，佢語帶無奈咁回應：「初初唔知對手，但時間幾合適，加埋7日打3場，對備戰亞運有幫助。我哋練兵啫，如果有啲強嘅對手梗好o架，但有時啲嘢真係唔到你去揀囉！假如日本搞4角賽，唔通搵香港去踢咩，梗搵番佢哋個個檔次嘅對手踢熱身賽o架。」佢仲叫求大俠同球迷講，佢已經有好多白頭髮，連鬚都白晒，所以唔會去諗如果又有球會唔派兵呢啲問題嘞！
講番嚟緊11月嘅亞運足球賽，家陣只知有26隊報名參賽，下個月3號則進行分組抽籤，而求大俠只望港隊食住上年攞東亞運足球金牌個勢，再畀香港體壇多啲驚喜啫！