林峯早前拍劇時，因強行佩戴超細頭盔，不慎觸及頸椎移位舊患，起床時見暈且動彈不得要留院3天。邊有咁易整到？實情是頸椎錯位有分急性慢性，平日邊用膊頭夾電話邊低頭睇雜誌便是開端，到病情累積至某個水平，隨時會因為打個乞嗤而全面引爆！
記者：蔡俊業
攝影：梁細權
Model：Juzco
場地提供：亞洲運動及體適能治療中心（25789877）
【滑液】（SynovialFluid）
由關節滑囊（Capsule）和腱鞘的滑液膜分泌，含類似黏蛋白質的透明黏質潤滑液，會在肩、肘、髖和膝等關節出現，能潤滑軟骨並使骨塊活動得更順暢。
頸椎移位原因
‧意外如撞車或跌親
‧長期姿勢錯誤如側頭夾電話、低頭看書
‧扭頸出意外
‧運動受傷
頸椎肌肉少易出事
上周林峯因頸椎移位入院留醫，據說8年前拍電影時，因遭客貨車撞到成為舊患。脊柱作為人體最重要支持，出事可大可小，陳允灝脊醫表示，意外受傷是頸椎錯位的主因之一，「撞車或者跌親都有可能，視乎撞擊力有幾大，如果係突然煞車拉親係輕傷，要好耐時間才病發，但假如喺公路百一米撞車咁嚴重，就會即時感覺到有問題。」註冊物理治療師周錦浩（Terence）則說，脊柱分頸、胸、腰3個主要部份，頸椎最容易有錯位及移位問題，「胸椎因為有肋骨撐住，所以好少錯位，腰椎size好大好實淨，旁邊又有好多肌肉包圍，亦好少會有事，相反頸椎周邊無乜肌肉支撐，好容易整到。」
醫生鐘錶師屬高危
有幾容易移位呢？Terence說都是姿勢錯誤造成，他舉出多個例子，例如長時間打機和耷低頭看書、坐車時瞌眼瞓「釣魚」、由未經專業訓練的人扭動頸部，即大家理解的「扭頸」或經常縮起膊頭呼吸，長時間出現這些狀況都會有事。他說頸部的兩組肌肉：斜角肌同肩胛提肌，會因長期出現繃緊狀態，繼而引致頸椎錯位，「有人甚至連呼吸都會造成錯位，就係咁兒戲！」亦可能由於工作，部份需要長時間低頭工作的職業，如鐘錶、珠寶師傅，雕刻工匠同外科醫生等，都可能會有頸部毛病。陳醫生則說經常單邊負重、側頭夾電話及運動受傷，都會容易引起此問題。「初時就算有錯位，都會由身體去補救，即係關節同周邊肌肉會遷就，令你唔覺得有問題，就好似不斷有水滴入個杯度，過咗龍就會瀉，問題就會爆出嚟！」其中一個引爆點就是打乞嗤，但機會極微，「但如果條頸本身已經有事，打個乞嗤就可能會將問題引發！」
頭痛頭暈手麻痹
要確認有沒有頸椎錯位，除看醫生外，病人亦可自行判斷。一般情況下，若有頸椎錯位，患者會感頸部肌肉繃緊、疼痛、頭暈、頭痛和手部麻痹，Terence說如果此時還沒求診，情況只會繼續惡化，最嚴重是壓着神經線，「會覺得隻手無力，連揸筷子揸碗都會感吃力，手部靈敏度亦會減低，例如伸手摸銀仔，隻手好似帶咗手套咁，分辨唔到一蚊定兩蚊！」最差的情況是肌肉萎縮；至於意外而導致的錯位，更有可能引起下身癱瘓。陳醫生說，不少人或會將頸椎有事和一般的頸梗膊痛混淆，若只是通宵工作或運動過後而產生的遲發性肌肉痠痛，不應該持續超過1至2天，「如果過咗4日都仲痛，咁就好去睇醫生！」
動態觸診作判斷
若找醫生或物理治療師臨床判斷，他們會用「動態觸診」（MotionPalpation）方法判斷病人的頸椎有否錯位。Terence說正常情況會先為患者照X光片，繼而按照以下標準去確認：先觸摸患處有否出現熱感，接着是摸摸肌肉或軟組織有否腫脹，第三是頸椎關節的排序是否正常，「正常關節與關節間應該係平坦，所以要檢驗一下有無因錯位而凸出！」第四是觀察周邊軟組織有否出現痙攣，「如果有，軟組織會變硬收緊，好似條橡筋咁，我哋叫MuscleSpasm（肌肉痙攣）。」最後會看關節的移動範圍，正常情況下扭動幅度左右最多可達80度，若少過40度，即代表有事，「我哋會按照以上資料去診斷而決定用邊種治療方法，有時五樣都會睇晒，因為每個人都唔同，就算同一個人喺唔同階段，整親一日、一個月、一年，同埋邊一節錯位，治療方法都會好唔同，當然平時可以通過做些簡單運動，舒緩繃緊情況！」
舒緩繃緊動作
伸展斜角肌及肩胛提肌
1.坐直，左手放身後並拉着椅背。
2.頭往右邊垂下並用右手輕拉，令頭肩距離增加，維持15秒，然後重複動作，左右做4次。
拉毛巾增頸椎滑液
1.頸椎關節因錯位缺乏滑液或卡住，可借毛巾拉力令滑液分泌增加。將毛巾捲起墊着後頸，頭仰天。
2.用毛巾把頭拉向上至最高點，放鬆，重複動作8次，其間手要跟頭一齊移動。
拉橡筋帶 鍛煉深層頸屈肌
將橡膠帶放在頭後，雙手拉帶的兩邊，頭部出力往後拉，維持10秒，重複動作4次。
（以上動作適合沒有頸椎移位或頸椎移位康復病人）
其他治療方法
按穴位
可按肩井、百勞和風池三個穴位改善頸椎錯位帶來的痛症。
牽引儀
用機器牽引頭部，令頸椎回正常位置。
