獨立監察警方處理投訴委員會主席翟紹唐，上星期接受劉慧卿網上電視OurTV訪問，大呻資源唔夠，希望警方可以開大水喉幫補吓。卿姐聽見監警會唔夠錢做嘢都抱不平，擔心唔夠資源會妨礙監警會工作，例如處理市民投訴經年，對市民同警方都唔公平，所以節目翌日即刻致電一哥鄧竟成，提醒佢唔該救救監警會。
卿姐引述一哥喺電話都有解釋咗兩嘴，卿姐打蛇隨棍上，建議警方不如派人上OurTV節目解畫；一哥竟然冇當卿姐呢個邀請係耳邊風，日前回覆接受邀請，不過唔係親自上陣，而係千挑萬選明益警務處監管處長鄧厚江。節目暫定本月30號開咪，鄧Sir要做定功課嘞。