廉政公署下月舉行開放日，市民除咗可以近距離接觸廉記從未開過嘅善良之槍，廉署人員亦會即場講解幾宗大案嘅秘辛，除咗香港人耳熟能詳嘅葛柏案，仲有近年嘅插盲眼呃保險案等。如果想品嚐廉記咖啡，到時亦可以畀錢飲番杯。
展插盲眼保險騙案證物
廉署社區關係處首席廉政教育主任曲廖秀芳同八方講，10月23日同24日開放日可招待3,000名市民，到時會分批每次安排80人入去廉署總部大樓參觀個半鐘，包括參觀歷年主要證物、錄影會面室、單鏡反光列隊證人室、廉署招聘資料，仲有廉署嘅槍械設備，市民仲有機會接觸呢啲善良之槍。
廉記有個「火槍隊」，由部份經挑選同受訓嘅執行處人員組成，如果搜查行動或者保護證人時需要到，佢哋就會出動，但自廉署74年成立以來，呢啲佩槍人員都未開過槍，所以佢哋啲槍暫時都仲係善良之槍。
曲太話，今年新增展品有插盲眼保險騙案嘅證物模型，呢單06年偵破嘅案件，涉案集團招攬內地人來香港，再用其他人嘅身份證參加內地旅行團，買埋旅遊保險，集團再安排醫生拮傷受保人隻眼，訛稱喺交通意外受傷，呢啲受保人再向保險公司索償，有保險經紀就收賄幫手。最終，單案有七個人被捕，入獄21個月至5年半。
參觀證可貼各部門貼紙
展品仲有個天秤，上面一邊係個假眼球，一邊係啲假錢，曲太解釋話，案中有受保人搞到失明，但係所獲報酬只係萬幾蚊，「好似錢比隻眼重要咁，法官都話駭人聽聞」。佢又話，拘捕集團主犯時，發現係用個飯盒裝住啲假身份證，所以展品裏面都有個類似嘅飯盒。其他首次展出嘅案件仲有飲食業貪污案等。今年去開放日嘅市民仲會首次獲贈參觀證，可以貼上廉署各部門貼紙。
為免市民輪候，今年廉署派飛有新安排，即日起可上網或親身索取申請表，每人最多申請四張入場券，仲要揀埋參觀時段，交回或者寄回申請表，該署會電腦抽出3,000個市民派飛。
mailto:[email protected]
廉署開放日
時間：10月23日下午1時至晚上8時、10月24日上午9時至下午8時
地點：北角渣華道303號廉政公署大樓
申請入場券日期：9月13日至27日
網址： http://www.icac.org.hk
資料來源：廉署