日本全日空ANA上星期宣佈，拍住香港私募基金第一東方投資集團，組建日本第一間廉價航空公司。正當大家嘅焦點放喺「東京飛大阪最平可低至$460」之際，華華就更有興趣了解吓第一東方做咩搞航空嘞，唔係話華華冇興趣搭平機呀，只係想學吓人哋嘅投資之道，搵到真銀就搭乜都得喇！
中日拍擋組建東瀛首家廉航
第一東方點把炮？先講佢哋董事諸立力，後生一輩投資者同記者應該唔係好識佢，查實佢大有來頭，曾經係香港交易所理事、證監會顧問、香港回歸嗰陣仲做過中央政策委員會委員㖭。90年代初，就係佢北上向阿爺倡議畀啲國企落嚟香港上市o架嘞，結果梗係掂喇，青啤（168）、廣船（317）、上石化（338）咪落晒嚟囉。
喺88年嗰陣，本身係律師嘅諸立力，創辦咗第一東方，投資基建、物流、輕工程同埋金融服務……戰績如何？諸律師好謙咁話好好彩，由92年起，每年增長唔少過30%，家capitalavailableforinvestment超過10億美金，而公司仲係zerodebt㖭。
點解戰績咁彪炳？諸律師話，佢一向奉行「唔知唔做」呢個宗旨，所以由當年科網泡沫到前年金融海嘯都唔關佢事……
講番佢呢檔新投資，諸律師話，下個月先至正式簽約，好多嘢家唔方便講，但係佢就叫大家幫幫手，為佢檔新生意起個好名，一經採用，或者包你一世免費搭飛機o架！
Bytheway，畀個貼士大家，諸律師已經諗咗單字一個「A」，大家可以諗少個字嘞！
李華華
mailto:[email protected]