風水富豪陳振聰喺爭產案敗訴之後相當低調。有讀者早前向八方報料，話佢搭早機由溫哥華返港時，落機嗰陣忽然俾一對夫婦打尖，佢望吓個女人有啲面善，個樣極似陳太譚妙清，咁隔籬嗰個照計梗係風水大師，但係讀者話，望落去真係完全認唔到，因為只見呢個人一頭濃密短髮，仲明顯減咗肥，收晒身、連招牌嘅哨牙都唔見咗，睇落同當年同埋小甜甜合照嗰個玉樹臨風造型差唔多，只係皮膚黑啲神情憔悴啲。
至於陳太，身形就冇乜點變，但啲名牌手袋、首飾通通唔見，只係有隻好似鐵線咁嘅戒指仔，對腳着住對拖就行人，唔知係唔係要配合老公低調嘅新形象，抑或係呢個look有助轉運呢？