司馬文喺南區補選贏咗漂亮一仗，打低葉劉淑儀新愛將劉應東，公民黨上上下下都不知幾興奮，前日、即係9月11日仲特別為呢次補選搞咗慰勞宴，多謝黨友兼泛民友好鼎力相助。雖然司馬文係慰勞宴嘅主角，但風頭就俾黨魁余若薇蓋過，事關當日係余大狀57歲壽辰，黨友特別預備咗個蛋糕，亦當然唔少得余大狀嘅老公胡健維醫生。
一向低調嘅胡醫生仲喺太太吹完蠟燭許完生日願望後，公開送上深情一吻，羨煞身邊唔少人。除咗胡健維，另一位對余大狀影響極深嘅男士李柱銘都有出現，如果當年唔係馬丁鼓勵余大狀參選，睇怕香港未必會有公民黨，所以余大狀見到馬丁到場都好感動。