由被熱捧歌手變做三線演員，蕭正楠兩年前返無綫，一簽六年約，忘記以往八人護駕的風光日子，孤身上路，卻又學會謙卑、懂事，在電視城重新開始，一切總不算太差，拍完《宮心計》，接棒演《公主嫁到》，飾演怕事、軟弱的大駙馬，終日被大公主虐待，連後庭都逃不過厄運。 撰文：楊潔雯
蕭正楠08年再簽約無綫，不過今次不是簽歌手合約，他簽約成為無綫合約藝員，為期六年。返到無綫兩年，拍過四部劇集，也不算太差吧！其中兩部都是收視口碑都賣座的《宮心計》、《公主嫁到》，運氣也不俗！
叫敏之放心打
蕭正楠第一時間想多謝再給機會他的監製梅小菁，他說：「真係要多謝小菁姐，我返嚟可以拍到佢嘅劇，拍完《宮心計》，仲可以再拍《公主嫁到》，今次大駙馬呢個角色仲有得發揮，雖然大駙馬係好似軟弱無能，又成日俾大公主恰，俾佢兜巴星，又要俾佢虐待，好彩觀眾反應都係可憐我，唔係憎我。」講到劇中大公主虐待大駙馬，除了手瘀腳瘀，就連臀部都不放過，劇中大駙馬更欲脫褲子向演多祿的陳豪展示傷勢。
四個駙馬，各有不同，大駙馬算是最弱、最慘、最可憐的一個，他有好多場戲都要被大公主虐打、扭耳仔、喝罵，蕭正楠說：「成日都要俾公主打，好彩同敏之幾熟，大家夾得好，好多次俾佢打，我事前都叫佢大力打落嚟，最初佢唔敢打落嚟，打落嚟只係聽到陣風，之後我叫佢放心打，先有更好效果。」他續說：「雖然最初都係成日俾人鬧俾人打，好似好慘咁，之後大公主俾人趕走，我都有跟佢一齊走，之後仲感情好好，真係患難見真情。」
講到香港跟內地的電視製作，曾經在內地歷練了一段日子的蕭正楠說：「咁真係兩樣嘢，TVB係好有制度，家都好有人情味，唔會俾你踩到好辛苦。」被流放在北京的日子裏，蕭公子變回蕭正楠，他真真正正體會到生活的實在，他說：「以前出嚟就咁多人圍住你，又有少爺脾氣，根本唔知自己其實好細，好多時候係有代價，你越紅越忙，可能你會周身病痛，我家對所有嘢係順其自然，感覺輕鬆自在。」
成熟學會放低
似是放低不少，又成熟了一點，33歲的蕭正楠對工作並不是無期望，不過，他最怕太大期望又一再失望，他說：「我仍然好鍾意唱歌，你問會唔會主動搵唱片公司，我一定唔會，仲想唔想出碟、拎最受歡迎男歌手，我就諗都唔會諗，當然如果有主題曲畀我唱我已經好開心，總之有嘢畀我做，家我一定會努力做，因為我知道我已經唔細喇！」
笑聲之最
最好笑同劇男演員 陳豪
「估唔到陳豪神高神大，可以話暈就暈，佢演到個角色好跳脫，仲有好多搞嘢表情，因為佢畀人印象好正經，所以同佢一齊演覺得好意外。」
最好笑同劇女演員 佘詩曼
「佘詩曼畀我感覺佢揮灑自如，做得好自然，好多角色都難唔到佢，今次演刁蠻三公主，表情又精靈，佢同阿Mo（陳豪）一齊真係好有火花。」
最好笑自己演出的一幕 失心瘋展示傷勢
「最深刻就係有一場大駙馬向多祿哭訴自己受大公主毒打虐待，又講出自己為咗家族犧牲做駙馬嘅經過，嗰場好搞笑，我話要俾大公主虐打嘅傷畀多祿睇，自己失心瘋連『後庭』嘅傷都打算畀多祿睇。」
