青海大地震捨命救人嘅英雄黃福榮精神長存。有機構最近搞咗個《阿福精神——香港的光榮》徵文比賽，有過千個學生參賽，噚日頒獎，奪得初中組冠軍嘅中二學生趙文慧，用紅燭比喻阿福生命雖然到咗盡頭，但光芒唔會消滅。趙文慧同八方講，阿福助人嘅光芒令原本被動嘅佢，決定主動幫身邊嘅人，今年膽粗粗自薦做班長，希望服務同學。
高中組冠軍係中七學生吳志鴻，佢篇文章讚揚阿福嘅犧牲喚醒香港人。吳同學仲話想學阿福，將來會利用業餘時間到內地山區教書，希望幫助班山區兒童脫貧。
小學組冠軍係年僅10歲嘅江蕙瑜，佢將阿福精神喻為永不泯滅嘅火炬，將會一代代傳遞下去。