SUV似超跑　3小時追逐波子夢

全新2011款Cayenne實現了我體驗超跑SUV的夢。新車到港已火速出牌，毋須Sales掛紅牌跟車，我索性踢走埋模特兒，遊走深淺赤石直路山路同彎路，三粒鐘盡情慢慢嘆。只嘆夢醒時分跟車速一樣，嗦一聲便過。

記者：徐影龍
攝影：伍慶泉

身高䠷　具威勢

坐上PorscheCayenneS的一刻，的確令人有如墮夢境之感。來到第二代，改款幅度頗大，外形變得修長，頭燈、氣壩、輪廓圓滑中帶點剛硬，正面看有着相當強烈跑車風格。SUV車種及配上21吋巨軨關係，車身高䠷別具威勢，不熟悉車的人，都感受到CayenneS的高貴威嚴。
走入駕駛艙，中控台設計得頗有四門豪房Panamera味道，一堆多功能設備集合一齊，就手兼易搵，加上因軸距增長48mm而獲益的特大空間感，闊落得如置身豪宅。車身物料改良，以及全新主動式四驅系統，令車身偷輕180kg，不但低耗油及低廢氣，揸起來亦輕盈得如四門Panamera。在深淺赤石遊走間，於窄窄山路曾遇過3部舊款Cayenne，我不但未因揸住新款而沾沾自喜，反倒與大家迎頭打個照面，感覺有種識英雄重英雄之氣概。
三小時眨吓眼就過，泊好車準備熄匙還車，甫一開門，座椅自動稍微向後，令我這個長腿叔叔可更舒適地落車。這些雖不是高科技設備，但加了一堆體貼窩心的功能，實在令人更依依不捨。