「萬人迷」碧咸返嚟喇！因足踝筋腱重創唞咗6個月嘅英格蘭中場碧咸，真係如佢自己所言，係「911」復出，佢雖然只係後備入替踢咗20分鐘，但風采依然，仲鬼咁好腳頭，旺氣助洛杉磯銀河以3:1擊敗前總冠軍哥倫布機員，並重登榜首。
35歲嘅碧咸今年3月14日外借AC米蘭時受重創，左足踝筋腱撕裂，連南非世盃都唔踢得，之後仲俾AC嘅新帥艾基利落井下石，話佢老，球隊唔會再借用；而英格蘭領隊卡比路亦同樣暗示唔會再用碧咸，仲話同佢搞紀念賽！
復出銀河踢20分鐘
但碧咸行走江湖多年，有咩風雨未見過？佢一於少理呢啲流言蜚語，專心康復療程，結果俾醫生預期早一個月復出，上周六首次替銀河喺今季披甲。當佢喺70分鐘入替時，銀河主場家得寶球場掌聲雷動，有部份球迷更起立鼓掌。雖然碧咸入替冇耐就攞張黃牌，但表現唔錯，有幾腳斬波，無論功架同準繩度，同當年佢踢曼聯或者皇馬時差唔多；最後銀河亦憑艾臣布度、高維蘭高同基奴夫斯基各入一球，以3:1勝出，以24戰得47分重登西岸榜首同總榜榜首。
踢咗20分鐘的碧咸賽後話：「好高興可以重返球場，我從來未試過因傷要唞咁耐，所以可以再次比賽呢種感覺實在太好喇！4個月前已經以為自己可以踢足90分鐘，但正式比賽時，我踢咗10分鐘已經想死，好彩適應咗比賽節奏後，感覺就越嚟越好。」至於銀河教練艾連拿亦說：「以碧咸呢個年紀，仲可以喺咁短時間內復出，佢嘅鬥志同努力，都係其他球員值得學習嘅地方。」
其實，除咗碧咸外，另一名老將亨利喺美職聯都好威，上周六佢替紐約紅牛射入一球，助球隊以3:1擊敗科羅拉多急流，除肯定攞到季後賽資格外，仲追趕緊東岸榜首嘅哥倫布機員㖭！
