三十而立嘅港台王牌節目《城市論壇》越老越受歡迎，每個星期成為維園阿伯同阿哥嘅吹水陣地，幫唔少市民抒發一口寃屈氣。由於現場人數越來越多，好多人都未必爭取到發言機會，就連台上嘉賓都覺得到喉唔到肺。《城市論壇》果然冇令一班粉絲失望，主持人謝志峰噚日喺論壇上宣佈喜訊，11月起會加多一節時間，換言之節目會由家嘅45分鐘延長至1小時，現場粉絲紛紛拍手歡呼。
CY被寸「思想最歪」
其實《城市論壇》家已經有不成文慣例，就係電視直播完咗後「安哥」10分鐘，等台上、台下嘉賓暢所欲言。咪以為冇咗直播班維園阿伯同阿哥會收火，八方幾次現場觀察，發現安哥期間嘅火花有時仲多仲熱。
好似噚日講仇富問題，疑似特首候選人梁振英係嘉賓之一，雖然維園阿哥等人見到CY出現好鬼high，響應謝志峰呼籲善待異見人士，紛紛拍手叫加油，但台下嘅佢哋舉起「思想最歪」嘅標語諷刺，仲要喺CY離場時質問佢到底支唔支持廢除功能組別，CY當然無直接回應就即閃啦。