有咗YouTube之後，有好多人可以自拍影像上載，娛人娛己，至於有幾多個hit，不是問題，上網之後，全世界都睇得到，在網上永久流傳，或者某時某日俾有興趣嘅公司hit中，睇中呢。
馬主N位公子就有一個「球迷奇遇記」嘅故事。呢日睇報紙，知道聖保羅男女校開入學輔導會，家長踴躍參加，例如風后李麗珊，又話民政事務局副局長許曉暉本來與一眾副局長，政治助理去咗上海嘅，特別離隊返港，趕住Co-Ed參加輔導會，顯見為咗爭Co-Ed一個學位，家長乜都肯制。馬主N兄弟兩人就係呢間名校產品，佢位公子就由一年班讀到中四就離校去澳洲。聖保羅男女嘅學生盛產唱家班與樂器高手，馬主N本身唱BeeGees舊歌，幾乎假可亂真，佢位公子就彈結他，學作曲，研究樂器構造，對馬主N講：「我想入大學讀MusicTechnology。」馬主N話：「喂，呢科好冷門喎，冇乜大學有呢一科，讀完出嚟又點搵工呀？」九十後邊會聽阿爸講o架，卒之搵到一間大學有呢門學科，自拍一個video表演，送去做入學申請嘅輔助文件，並且上載到YouTube。估唔到竟然有奇蹟出現，一間當地大公司在YouTube立即與N公子聯絡，要求會面，並且願意與N公子簽約，贈送大學獎學金。大公司做星探？發掘另一位新歌星？非也，大公司代表話：「今日好玩band之人極多，但能夠讀大學又要讀音樂科技嘅，而且對音樂有天份嘅學生就難得一見，我地願意栽培你，畢業後就到我地公司做事！」
N公子當然歡喜到暈，但馬主N一口拒絕，話自己供得起佢讀大學，但亦因此唔反對個仔主修音樂科技。問馬主N：「何謂音樂科技？」馬主N話：「即係研究音響、音質、演奏廳的音響設計等等。」哦，幾專門噃，聽講中文大學EstherLee大樓內之音樂演奏廳之音學甚為講究，由捐款人利家斥資聘請芝加哥音學專家設計。尖沙嘴文化中心演奏廳內嘅音響不時俾一啲專家批評為唔多妥，但我地普通人就未必聽得出。業餘戲曲發燒友，前報紙總編C姐就教路，要坐在演奏廳樓上某一行先至值得買貴飛。