B仔個仔、仔女個女……不過今次唔係串字喎，係串電影劇情！《人間喜劇》故事不停穿插經典電影場口，扮完葉問、再扮朝偉；睇完老翻版《集結號》，再睇英語版《喋血雙雄》，一幕幕經典爆笑重溫。不過無槍戰聲效又無打鬥場面，奇怪點解仲要出Blu-ray碟呢？
記者：陳國輝
串燒戲名作古仔
有時為咗向某位導演、電影等作出致敬，都會拍攝串燒式電影！好似《搞乜鬼奪命習作》呢類，擺明無劇情，得啖笑，不過係美式笑料，文化背景唔同，我就笑唔出喇！
《人間喜劇》片長105分鐘，身為港產片，在戲中加入大家熟悉嘅經典電影元素，仲有肥澤不時搞爛Gag，令成套戲不斷有爆笑位。最精采要數到中段，劇情講肥澤為隱瞞殺手身份，即場老作古仔，更抵死引用戲名作串連句字，出口成文，橫跨超過30套電影，雖然明知係讀稿，但真係要寫個服字畀佢！
高清膚色無Bonus
《人》推出DVD同Blu-ray兩個版本，買邊隻好，我就話無分別囉！無錯，藍光有DTSHD-MA7.1同埋DD5.1，但當你睇晒成套戲，或者你會諗，究竟邊一幕用得着先？莫講話激烈嘅槍戰爆炸片段，就連少少緊張位亦唔覺眼，環迴立體聲可謂無用武之地，嘥咗！
但話說回來，高清畫質都叫合格有餘，除了些少Noise，整體顏色好統一，尤其薛凱琪化嘅淡妝，你可以清楚睇到，感覺好自然，唔造作。
一般影碟必送嘅Bonus，如導演專訪、製作花絮等「行嘢」，佢竟然全部都無。而所謂「SpecialFeature」，只有影片預告以及幾張劇照，真係令人失望。
經典回歸變高清
經典場口 逐個睇
Profile
類型：喜劇
畫面：1.85比1
音效：DTSHD-MA7.1、DolbyDigital5.1
特別收錄：預告片、劇照
$135（Blu-ray）/$77（DVD）
