要不是搽了指甲油，可不會發現……嘩！乜呢個世界原來咁多汽水用拉環！……嘩！乜呢個世界原來咁多袋要拉拉鏈！……嘩！乜呢個世界原來咁多牛仔褲要扣銅鈕！……嘩！乜呢個世界原來咁多手錶帶要用指甲「撩」開！……總之平日好哋哋的生活，只不過因為塗了一層薄薄的寇丹（甚至不是「丹」的），便起了一些不小的變化，彷彿一夜間開了陰陽眼，發現全個世界並不「指甲friendly」的事物還真不少呢。
就像某天touchwood你跌傷了韌帶要坐幾天輪椅，才驚覺這裏和一個「無障礙城市」的距離有多遠。
另一感觸：我等粗生的人，又不是十指不沾陽春水，飲罐汽水都「噯，唔該！」動口不動手，試問又何德何能捍衞十隻靚靚指甲仔的完好無缺？實不相瞞，我三十幾歲人時才貪得意第一次學人上Salon髹指甲，處女航那天都未出髮型屋門口……不知邊條茂利突然send短訊話我知我搵緊對鞋43號已全亞洲斷碼……冷不防我一手篤掣，說時遲那時快價值500大元的手工藝作品已立即崩了一忽……唔通我馬上U-turn返入去求個美甲師姐姐急救番？一隻收順啲得唔得？
又另一感觸：如果唔油指甲你話幾free呢？做乜都得，點做都得。再諗落一層（「諗落一層」，這是個非常「inception」的形容詞！）時裝常常令一個本來健全的人殘缺，至少是「我本來可以的，家唔得」地違反了大自然的設計，廢了你雙手武功的指甲油只是個開端吧……
i.又說高踭鞋，它到底讓你有幾多本來做得到的動作變成做不到？有個女性朋友說：「每個女人一生中起碼有兩三單大鑊嘢是因為高踭鞋而發生的！」我不是女人當然不知道是否講得中肯，但如果是的話，看相的算命的，請與時並進，在你們預言之中的「劫類」一欄，加入「高踭劫」一項，反正命中率如此高，值得自成一項啩？
ii.就算不是高踭，作為男生，那些造得不好的鞋一樣危害健康吧，最怕的是隱藏的刮腳鞋，買的時候你就算試足20分鐘都好似好舒服，真的着了出街行了路45分鐘後才把你對腳刮損了，最慘的是兩頭唔到岸，難道你真的有時間有budget即刻飆去買過對新嘅鞋？要襯得到番你今日套衫喎？
iii.事實上那些一坐低便肚腩的超級大皮帶扣亦從來未買過，無論佢有幾興！
iv.但腰封真是好美的，我甚至願意為它捱點小苦，但有沒有人能告訴我用了它才去吃晚飯是不是真的不會嘔？
v.常常有這樣的疑惑，一個人的form……form點講？……即是形狀啦，站起來和坐下來可以是很不同的，所以呢，有些衫站着穿上是很好看的，就算有點兒危險但勉強還是可以支撐的，不過一坐下來，那些骨肉的分佈便不同了，那個form便變了，不但某些衫變得不再悅目咁簡單，而是物理上會hold不住爆開呀，像某些只得站不能坐的長裙和長靴，那麼，請問，這種時裝設計又是不是違反了自然呢，一個只能企不能坐的人又算不算某一種傷殘呢？
vi.穿耳和染髮其實又算不算某種程度的自殘？
vii.信我，戴冷帽是會損害聽力的，因為它不蓋着半隻耳仔又不好睇，但蓋着你又聽不到……喂……喂……咩話？……大聲啲吖……喂……
viii.沒有太陽時戴太陽眼鏡不會令你盲掉，但會有一點點色弱倒是無可避免的吧，講起色弱，便又想起我老友第一次comeout告訴我們他色弱的故事。那一天他剛從日本留學5年回來跟我們catch-up一下：「啊，忘了告訴你們，我終於發現了我是紅綠色弱的？」大家便異口同聲：「嘩，咁你點考到車牌o架？」他大概被問過一千次同一條問題便冇你咁好氣地笑笑口說：「紅綠燈嘅排列係有固定次序o架，唔使認顏色o架！」各位咪笑！我上個月聽電台時事phone-in節目，主持人第一反應也是問一樣的問題。
ix.我有時會想，沒有了時裝，我會舒服幾多、健康幾多，但拿走了這些違反自然的身外物，我們就只能靠做運動健身來美化自己的外殼，因為再沒有其他東西可以幫你隱惡揚善分散人家的注意力。我其實不是說做運動健身不好，但當世上剩下的，只有單一的審美標準，又真是沒那麼好玩，甚至有點悲哀的，所以，那些因為fashion而導致的身體機能喪失，我們惟有阿Q地視為人類某種升呢後的高貴退化吧。
Textby黃偉文
mailto:[email protected]
微博 http://t.sina.com.cn/wymanwong
本欄逢星期日刊出
