隆成（1225）高息兼高增長，股價剛剛貼住1年高位，買入等爆邊。隆成主打多項嬰兒及幼兒產品產銷。集團呢期剛公佈2010年半年度（6月底止）業績，純利就急升咗7成到5900萬元。就當下半年度純利，同上半年睇齊，隆成全年度純利1億元，PE都係10倍。隆成全年度純利keep住70%增長，純利1.2億元，預期PE得8倍幾。又隆成近年開多瓣內地零售業，隨住祖國同胞富起嚟，加埋嬰兒及幼兒人口高峯潮，隆成繼續肥仔水。
隆成最新中期息增加25%到2.5仙，就當集團今年末期息維持4.5仙，息率都講5厘樓上，若全年派息維持25%增幅，息率高達6厘，吸引到痹。呢轉博隆成爆上，現價1.34元博翻半番到1.99元，預期PE都係得12倍，ChinaPlay當中，仲係好平。
粵首短打博升兩成
粵首環保（1191）去年尾公佈收購林木業，剛喺上個月先正式搞掂。但集團完成收購兼轉型以嚟，股價仲喺近兩年低位上落，無點郁過，現價0.129元，相對52周低位0.102元，亦唔係高好多，殘到痹。又粵首最新NAV每股0.26元，現價折讓51%，有唔錯折讓墊底。對上星期五，粵首交投先嚟異動，嚟轉短打，博升20%到0.154元，粵首未有耐上到NAV。
錢雋