國家主席胡錦濤喺深圳單獨接見李超人（圖左），成為全城近日最大懸念，李超人噚日喺一個國慶酒會現身，成為全場焦點，記者即時追訪，問佢點解獲胡主席厚待，超人好口密，只係揮手示意冇嘢講，不過佢笑容繼續燦爛，似乎仍在回味獲國家主席接見嘅興奮。
領導人器重超人，有人指國家始終都係認為商人治港先靠得住，特首煲呔（圖右）頓時靠邊站，噚日煲呔都有到場，抵達時超人眼明手快企在門口迎賓，煲呔主動上前同超人握手，之後兩人咬耳仔，是否交流最高指示，佢哋兩個自己先知。
國慶酒會致辭、祝酒、唱歌等繁文縟節做完後，超人急急腳離開，記者再追問佢商人治港、李嘉誠惡晒等問題，佢終於開腔：「今日唔會答任何嘢。多謝，多謝。」雖然冇嘢講，不過超人上車後校低車窗，好風騷咁同記者猛講ByeBye。
出席酒會嘅曾憲梓勁撐超人，話「商人治港係應該嘅」，又指胡錦濤平日好忙，冇可能見晒咁多人，只見李超人一個，合情合理。