三年前去劍橋修讀歷史學博士嘅武俠小說名家、《明報》創辦人金庸查良鏞，研究唐代盛世時期，東宮太子繼承皇位制度嘅論文獲高度評價，獲頒哲學博士學位（PhD），以86歲高齡獲此學術成就，真係學到老典範。
獲頒博士學位
劍橋院長同金庸論文導師、漢學大師DavidMcMullen，特別來港頒授博士學位畀金庸，噚晚由「香港劍橋之友」主席李國寶做東，喺香格里拉夏宮舉行晚宴兼頒授學位儀式，儀式雖然簡單，但一樣咁隆重，院長按傳統以拉丁文宣讀金庸獲博士學位。
據講呢次可能係史上首次劍橋院長去海外頒學位，院長強調金庸呢個博士係勤力鑽研學問取得，真材實料也。噚晚佢千金、女婿、陶傑、張敏儀都在場，齊賀金庸成為劍橋博士兼榮譽院士。