面對善變的人，你會無所適從，但愛上善變的物，就會覺得充滿新鮮感。好像本田的人氣賣車王Jazz，雖然賣了好幾年，但變出的形象多到記唔晒，最近推出的JazzSportsNeo版，大玩東瀛味，令成架車煥然一新夠晒型，係人都想為呢位百變爵士影番輯百變寫真先！
記者：趙慧敏
攝影：林栢鈞
Model：Jancy@Zmodel
LED燈方便上落車
不過唔好以為推個日本版就只是大路嘢，打開車門，又發現另一個驚喜，原來底部一列LED燈組每當開啟車門後，就會自動亮起，就算夜晚上落車，有佢照住無有怕；另外，四個SportsNeo版的車窗雨擋，全部採用新設計，一改向外拋的傳統雨擋設計，反而以貼近車窗設計，拍攝當日下着微微雨，親身經歷保證新設計絕對無損擋雨功用。至於內櫳，在軚環及波棍位置採用撞色效果，以鮮紅色配搭色調低沉的車櫳，格外搶眼，其中軚環位置更參考跑車設計，縫上紅線，突出跑味。
日本包圍 動感型爆
香港人多車多，的骰車仔一向受歡迎，Jazz就是賣咁多年紅咁多年，不過睇得多總會悶，代理當然知客仔心理，所以最近又推出一款日本版JazzSportsNeo，更找來一部較罕見的橙銅色車來拍攝，務求襯絕型格設計！
望見此車，即時想起少林寺十八銅人，兩者同樣是睇得又打得之輩。聽到JazzSportsNeo個名都知道是走動感路線，除了基本車形外，車身不少配件都換掉，車頭由鬼面罩延伸至氣壩及頭唇等，都換成全新日本版包圍，輪廓分明且具肌肉感，令全車更顯貼地效果。加上兩側裙底微微向外翹起，行車時猶如在馬路飛翔，加上電鍍霧燈外框與氣壩儼如一體化的設計，大大增加視覺效果。雖然望車總要由車頭望起，不過老實講，今次的一套頂置U形尾翼才最養眼，尾翼沿玻璃窗圍繞成U狀，含蓄而低調向後延伸，令整體車身顯得突出，感覺前衞。輪軨雖然保持15吋大，但合金輪圈就換上日本原廠Moduro五輻式流線型設計，外觀實在搶了不少分。
對JazzSportsNeo有興趣的話，今個周末及周日的10am-9pm於荃灣廣場舉行車展，於場內選購有機會獲高達$30,000優惠。
規格Profile
引擎：1,339cci-VTEC
馬力：100ps/6,000rpm
扭力：13.0kg-m/4,800rpm
傳動：五前速自動波箱
售價：待定
查詢：28278622（合群汽車）
