波神周記:呢粒糖係大茶飯

波神周記:呢粒糖係大茶飯

"朗尼召妓點及活士精采"

國際賽期在轉會窗關閉後展開,冇乜波睇冇乜波賭,加上學生哥告別暑假,夜晚收工感到漸有秋意,街上也冷清不少;熱爆新聞竟然係曼聯球星朗尼,被揭在太太懷孕期間多次召妓;呢類有味新聞近年實在太多,有幾多成真,小弟感覺已不多,傳媒砌極,點都唔夠老虎活士咁震撼啩?活士認錯後仍一沉不振;朗尼又點?實令紅魔躉擔心。C朗走後,迷哥迷姐靠晒呢位場上勇猛既「老虎狗」,連佢都信唔過,唔通靠成日想扮C朗嘅拿尼?

"數碼通多賺6倍我有份"

隨身最重要除咗銀包,當然係部iphone,晚上收工同好友飲嘢,唉,大懵唔見咗,搵唔番,呢勻真係大件事;幸得兄弟相助,三數天已能找到一部,錢多花了,最重要係不要讓自己心情一直沉下去,有心機貼好啲波,乜都補番數。見過鬼仲唔怕黑,今次順便去數碼通申請固網,幾十蚊月費仲送電話,樣樣都話要等幾個禮拜,去親門市都人山人海,唔怪得佢哋剛公佈業績,盈利升到嘭嘭聲!

"裝有線頂股價沉底"

數碼通股價係咁升,相反有線寬頻就每下愈況,跌穿埋一蚊雞;身邊好多人聽到佢哋講裝英超仍然氣憤難平,我心裏卻慢慢屈服;冇辦法,鬼叫英超係我生命,純睇波捧阿仙奴,落重注博吓車仔曼聯嘅波,企硬唔裝出街睇皮費仲貴。最重要係裝咗,可以同三五知己喺家中打邊爐飲吓酒睇吓波,人生一快事;好,趁呢排熱潮漸過,考慮幫襯吓佢哋,幫手頂住個疲弱不振嘅股價!

"聯賽返嚟要認真對待"

去到聯賽大場面,真係可以認真啲刨波,何況今屆歐國外改咗制,變為踢周五同周二,咁球星們就有多一天或以上時間,歸隊操練準備周末大戰,正路波估計抬頭機會較大。不過單係今日開嘅98場波,算你有幾雄厚財力,都未必有無窮嘅精力,切忌段段賭,邊段時間自己最放鬆,最空閒,check準出場陣容賭都未遲。巴塞對靴高斯,阿積士對威廉二世,兩主隊隔籬埠都要讓到兩球半/三球,即係贏到4球先收晒,離譜啲啩。不過冇人知美斯同蘇亞雷斯會唔會留力打歐聯,呢類牌面波,勸大家量力而為,最好玩,梗係80蚊買2串3波膽,不過如果開兩個「其他」,就得啖笑!

"小病是福搵鹿角愛華頓幫補"

破財加腸胃炎痾到腳軟,加埋冇波睇,真唔自在;好彩啲長揸股仔幾好,連六合彩買電腦票都中到4個半字,希望旺氣帶到本欄同身邊人。上次貼歐國外開晒對家真係肉酸,今次依然用精兵策略,重心賭兩場加多幾注波膽過關。上次寫賭波愛曼聯俾好友揶揄,其實都係以事論事;今次就唔同,英超早場愛華頓鬥曼聯,同戰鬥員A一致,真係唔信愛華頓咁差,今次更會好好招呼雞蟲朗尼,由熱變大冷,受讓半球,我博[+1]同冷W,望重演富咸迎曼聯歷史食大茶飯;串射日聯鹿角,隊波守力差咗,但今迎魚腩維加泰,信會收拾日聯盃出局心情盡情發洩。

語錄:歐國外提早打完,估計周六會有利聯賽熱門隊,不過作客讓波從來要謹慎;相反,強隊主場出擊,有部份球隊確有能力盡情發放。