兩份早前分別傳出易主消息嘅老牌中文報紙，賣盤行情有新發展。一度盛傳有意出售予新世界純官嘅《新報》，最新說法係老闆話「唔賣嘞」，不過，管理層「要執一執」，所以社長兼總編輯胡雪麗日前起身，轉頭請番老將馮兆榮返去坐鎮，有個新行政總裁返工，據講會主攻波、馬內容。
《新報》管理層噚日通知員工簽新約，10月生效，人工不變，但就有三個月試用期。有行家同八方講，暫不擔心大地震，事關07年都試過同樣情況，之不過假期、福利又要由零開始，可能唔着數。
《成報》方面，消息指楊家誠想賣番畀吳征，噚日佢否認賣盤，但承認日日燒銀紙，所以搵吳征幫助管理，「我同佢好老友，總之人力、物力乜都幫」。咁係咪唔會割愛呢？佢反問八方：「你有冇（買家）介紹？」可能怕八方以為佢講真，楊家誠又兜番：「我咁多生意，其中一樣蝕錢，當做善事囉。」