應屆港姐冠軍陳庭欣、亞軍張秀文同季軍莊思明，噚日同張嘉兒、苟芸慧去咗《2010國際中華小姐競選》喺尖沙嘴舉行嘅記者會，曾經俾人叫做「豬扒港姐」嘅陳庭欣，今年11月去天津代表港姐出戰，雖然家都未收到正式通知，但係陳庭欣就話：「我都有信心，但係壓力一定會有，因為今次係代表香港出去比賽。」佢仲話預咗會有人講「豬扒港姐」呢件事。
新聞認真多籮籮嘅陳庭欣，俾人彈完個樣醜之後，最近又有報道話佢出席贊助商嘅飯局，好PR咁敬酒失禮無綫，俾無綫要求收斂啲，又話佢成日同啲港男唱K。
否認失禮無綫
陳庭欣聽完就話：「我冇睇過呢篇報道，不過我去呢啲飯局只係會做好自己本份，通常會用橙汁代酒，況且我都冇飲酒嘅習慣，我次次飲酒出酒癩。」佢仲話為咗港姐嘅形象，已經減少咗去蒲。
由舊年1月做到家都未卸任華姐職務嘅苟芸慧，佢讚陳庭欣好靚好淡定，問到佢係咪加咗啲同情分？佢話：「我係真心話，我都希望可以親自幫佢戴后冠。」
另外，講到涉嫌貪污而俾無綫停職半年嘅陳志雲，有消息話佢下星期一（13日）復工，噚日有份出席記招嘅業務總經理鄭善強俾人追問呢件事，佢就話：「我唔知道呀，淨係喺收音機聽過傳聞，呢個要由高層決定，公司會喺適當時候有交代。」