今夏憑34E導彈火速成為宅男女神嘅楊梓瑤（Carol），噚日正式成為浸會大學通識及文化研究學系大二生，佢素顏開學，不過仲係畀眼利同學認出，三點式開工喺驕陽下暴曬都未嫌攰嘅Carol，噚日密實裝返學竟然怕曬要用書遮擋陽光。
現年22歲嘅Carol，今夏為谷處女寫真集，34E咪咪全程大解放，盡騷事業線，暑假前完成浸會大學副學士課程，仲順利獲浸大收錄做大學生，由於佢選條嘅係銜接課程，所以入學便是大二生。噚日重返校園嘅Carol，封咪素顏開學。
封胸素顏返學
Carol噚日朝早11時現身大圍，準備搭乘馬鐵返浸大位於石門嘅校舍，佢着住白色鬆身長tee配黑色legging，腳踏黃色布鞋，打扮樸素，佢一入車廂就耷低頭睇書同發SMS。Carol落咗車又急急腳行返學，其間撞到同學又親切打招呼，有傾有講，Carol噚日正式開學，即即粉碎早前有指佢拍噴血寫真踢出校嘅傳聞。
盛夏時最愛同陽光玩遊戲嘅Carol，三點式沙灘任影唔嬲，無懼似火驕陽，但噚日佢素顏密實封胸裝開課，咁啱又天氣熱辣辣，佢仲用書本放喺額頭遮擋陽光，忽然變得好怕曬。馮仁昭噚日打畀Carol，問吓佢開學情況，佢話：「今日開學好開心呀，噚晚專登早啲瞓，見番好多同學好有親切感。」
咀羅仲謙30次
Carol雖然今夏喺o靚模跑出，但佢堅持學業為重，課餘先拍戲行騷搵外快，佢近排接咗葉念琛新片《婚前試愛》，仲同周秀娜比演技。Carol又獻出螢幕初吻畀40吋巨胸型男羅仲謙，至於周秀娜就同萬寧哥哥沈志明有對手戲。Carol日前喺何文田激咀羅仲謙，二人胸貼胸，嘴對嘴，場面火辣，結果拍咗30次導演先收貨。據知電影公司打算搶閘聖誕檔上畫，硬撼同期嘅荷李活猛片《哈利波特》系列。
