上仗俾傑志作客逼和0:0嘅天水圍飛馬，今晚8點繼續喺主場元朗大球場出擊，面對揭幕戰表現令人驚喜嘅「升班馬」港會，主隊教練陳曉明賽前講明要以贏番漂亮嘅一仗，增強球隊信心！
飛馬上個禮拜六聯賽首戰，就硬撼由兩名前西甲兵領軍嘅傑志，結果新帥陳曉明針對防守奏效，但就冇波入。今場對睇低一線嘅港會，陳曉明賽前就話一定要以漂亮勝仗，增強番球隊嘅信心。至於上場助守為主嘅翼鋒李康廉（圖左），就話球隊今場肯定會踢得放啲，但強調唔會掉以輕心，一定要為球隊打開勝利之門。不過，我求大俠收到風，上場執到1分嘅港會賽前再簽入3名球員，包括前傑志射手麥基、喺奧地利業餘球隊搵食嘅雷拿，同埋後備門將卡普素。如想知港會呢支業餘隊去到咩水準，今晚就畀60蚊入場睇啦，長者同學生仲有廿蚊優惠票㖭！