曼城季初3場英超錄得1勝1和1負，成績ok，仲未使驚動大老闆蒙蘇掟定錢喺季中搵救兵。不過艾迪巴約、祖奧同辛達告魯斯等呢一大班領隊文仙尼睇唔上眼嘅廢將，嚟緊911星期六賽事就隨時變身雷霆喪星，喺主場對布力般流浪嘅時候騷吓哥利。點解？咪多得26歲仔話自己年紀大嘅泰維斯，呻啱啱喺阿根廷飛返嚟攰爆，同新加盟嘅巴洛迪利膝頭做手術要唞6個禮拜囉！
泰維斯呻攰懶到出汁
我求大俠懶人就見得多，但就未見過泰維斯懶得個藉口都咁有型。帶領阿根廷喺友賽KO西班牙被勁讚嘅佢，竟然話未必會踢2014年嘅世界盃，因為到時已經30歲已年老力衰，應付唔到高水準賽事，亦隻字冇提話想專心幫曼城捧盃。人老心不老就話啫，泰維斯家陣心老人不老咁冇鬥心，呢啲唔叫懶係乜呢！
後衞高路托尼最近仲解釋，文仙尼將佢帶開嘅隊長臂章交畀泰維斯，就係想泰維斯孭多啲責任。如果求大俠係文帥，聽到泰維斯嘅似是而非30歲老人論真係擰晒頭。
不過，最令文仙尼皺眉嘅，就係喺國際米蘭買過嚟嘅契仔巴洛迪利，喺上月尾處女作歐霸附對添美索亞拿入波後，整親膝頭哥，家陣要飛返意大利做手術兼養傷6個星期，曼城前線唔係好夠人用。
賽程緊密後備抬頭
計我求大俠話，與其畀舟車勞頓嘅泰維斯hea踢，不如出番已退出多哥國家隊嘅艾迪巴約掛帥攻布力般仲好啦！至於巴西嘅祖奧、啱啱跟巴拉圭去咗日本同中國掘金嘅辛達告魯斯，既然註冊咗入英超25人名單亦值得廢物利用，擺埋落後備席亦唔錯，話唔定佢哋有得落場會搏盡喪踢博表現。
其實曼城嚟緊賽程都幾頻密，特別喺16號踢完歐霸盃後，唔夠3日又踢英超；英格蘭國腳胡禮菲臘斯、韋拉以至可能係英超最佳後備龍門嘅基雲，都值得畀上陣機會keep住狀態，文帥不妨諗諗佢！
911隨時出擊曼城喪星
球員：艾迪巴約〈前鋒〉
今季英超正選/後備次數：0/2 上陣指數：★★★★★
球員：辛達告魯斯〈前鋒〉
今季英超正選/後備次數：0/0 上陣指數：★★★
球員：祖奧〈前鋒〉
今季英超正選/後備次數：0/2 上陣指數：★★★★
球員：胡禮菲臘斯〈中場〉
今季英超正選/後備次數：1/0 上陣指數：★★★★
球員：韋拉〈中場〉
今季英超正選/後備次數：0/0 上陣指數：★★★
球員：薩巴列達〈後衞〉
今季英超正選/後備次數：0/2 上陣指數：★★
球員：基雲〈門將〉
今季英超正選/後備次數：0/0 上陣指數：★
註：上陣指數以5★最高
曼城9月餘下賽程
11/09 英超 主對布力般流浪
16/09 歐霸 客對薩爾斯堡
19/09 英超 客對韋根
2/09 英聯盃 客對西布朗
25/09 英超 主對車路士
30/09 歐霸 主對祖雲達斯