師奶殺手陳豪繼過往型男角色後，近日再憑無綫劇《公主嫁到》搞笑駙馬爺金多祿殺出另一條血路。不過，雖然搞笑細胞備受觀眾讚賞，陳豪卻嫌自己功夫還未到家，揚言希望逐步摸索鑽研下，將來能夠像周星馳般成功建立自己個人風格。 撰文：戴彩煥
繼《秀才遇著兵》和《秋香怒點唐伯虎》後，陳豪再次在《公主嫁到》發揮搞笑本色，雖然外界對他在《公》劇中飾演金家二公子金多祿一角一致讚賞，但陳豪自問搞笑功夫還未到家，他日前接受訪問說：「我覺得自己喜劇感都幾強o架，但家仲摸索緊，希望喺喜劇方面可以再行前少少，到家我仲做緊功課，諗緊乜嘢位觀眾會鍾意睇。」
演喜劇學問高深
許多人以為表情動作誇張一點，便可以營造喜劇效果，但陳豪認為演喜劇是一門極高深學問，稍一過火便前功盡廢，他說：「喜劇好多時都係overact，有啲overact對小朋友嚟講會好鍾意，但對大人嚟講就麻麻，有時出多咗力，但唔中，就會被視為一啲多餘嘅嘢。」
究竟喜劇是否較一般劇集容易掌握？陳豪說：「應該咁講，拍喜劇可以畀個機會我放盡去玩，我可以演得好放，身體任何嘢都可以攞出嚟用，但所謂去玩，其實即係摸索。例如講對白超高音咁，我都唔知得唔得o架，見自己未試過，咪試吓睇吓觀眾受唔受，有時自己都會覺得多咗啲o架。」
陳豪不諱言希望演喜劇能像周星馳般成功，問他拍《公》劇前有否參考星爺作品偷師，他耍手擰頭說：「星爺嘅作品以前當然有睇過，但開劇前一定唔會翻睇，就算其他人作品都唔會睇，因為唔希望人哋嘅嘢入晒自己個腦度。所謂偷師，即係偷人哋嘅嘢，觀眾咁心水清，一睇就會發覺。我唔想攞人哋嘅嘢，好想由自己去創作、去設計個角色。我寧願逐part逐part自己摸索，想建立自己一個品牌，偷人嘅嘢我唔要，所以當我開工時更加唔會睇人哋嘅嘢，如果發覺有雷同，我都會要求刪咗去唔要。」
獲御准更改劇本
據悉陳豪、阮兆祥和黃浩然在《公》劇中的金家三兄弟戲份，因為出來效果理想，不但獲監製梅小青加重戲份，更罕有「御准」他們改劇本，陳豪笑說：「係加重咗戲份，估唔到第一次同浩然合作就有咁嘅效果。至於改劇本，呢樣嘢我哋都幾surpriseo架，因為小青姐唔鍾意人改佢劇本，但今次畀我哋咁做。其實編劇同事啲劇本已經寫得好好，我哋只係想出嚟嘅喜劇效果再好啲，例如有時見對白唔係全部押韻，我哋咪盡量執番靚佢。」
笑聲之最：最好笑同劇男演員 阮兆祥
「我覺得係阮兆祥，佢好識得搞氣氛，無論戲裏戲外都令到全場人又開心又放心，得琴姐同菊姐好開心。不過祥仔搞笑之餘，一埋位拍劇就會變得好認真。」
最好笑同劇女演員 佘詩曼
「非阿佘莫屬，佢今次做刁蠻公主handle得好好，做到不慍不火，因為如果一下子over咗、多咗，就會令到觀眾好憎你。」
最好笑自己演出的一幕 綵排捉姦休阿佘
「喺第11集有場戲講成家人諗計幫我休妻，祥仔扮姚子羚，李詩韻就扮阿佘捉姦，跟住我捉住祥仔俾李詩韻掌摑。嗰場戲大家啲timing夾得好好，出嚟效果好好笑。」
