香港人嘆慣冷氣，炎夏日子唔開冷氣恐怕好難自在過活，環保團體鼓勵大家少開冷氣，八方精神上十分贊成，身體上好難支持。民協今年同其他幾個政黨，響應無冷氣日，主席廖成利噚日話，自己都係市民長開冷氣嘅受害人，佢話以前去屋邨洗樓，就算大熱天時都好凉爽，因為家家戶戶都打開門唞凉，走廊風凉水冷。
近年洗樓一定身水身汗，皆因全部人閂門開冷氣，走廊唔扯風兼被冷氣機噴出嘅熱氣圍攻，變成大蒸籠，佢建議集中在屋邨推行冇冷氣日，集體唔開冷氣，齊齊享受生風，爽呀！咁幾時搞無冷氣日好呀？廖成利話最好出年2011年11月1號，易記喎。咦，嗰時入秋咯喎。