前排環保署有個助理署長被揭發喺辦公室上鹹網，每日睇足6粒鐘，結果被燉冬菇，人工由12萬幾降至約9萬元。呢位高官被燉之後，睇怕唔敢再公然上鹹網，點樣發洩內心苦悶，八方唔係心理醫生，幫唔到佢，但就可以介紹一份筍工畀佢，包保呢位鹹網高官勝任有餘。
影視及娛樂事務管理處最近刊登招聘廣告，聘請兩個娛樂事務管理主任，單睇個title，好似冇乜特別，但睇埋職責範疇，就知點解咁吸引。
根據標準檢查剪輯
娛樂事務管理主任嘅職務，唔止要處理電視、電台節目投訴，協助外景拍攝，最重要係可以根據電影檢查標準預先觀看、檢查並剪輯影片。
香港每年有唔少電影上畫，做呢個娛樂事務主任，有機會先睹為快率先睇未上畫電影，仲隨時成為大電影終極剪片師、小電影優先場觀眾，鍾意點cut就點cut，評埋齣戲係咪三級，咪話唔威水！呢份工起薪點$19,945，頂薪點$48,670。返工奉旨睇鹹片，買埋花生光明正大等睇戲，唔使鬼鬼祟祟，鹹網高官唔知有冇興趣轉部門？
本月20日截止申請
轉工要減人工，鹹網高官未必捨得，不過唔少宅男、毒男應該好「恨」做，既然平日上網都係睇甜嘢，有份工可以寓工作於娛樂，咁盞鬼，值得一試；而且呢份工入職要求唔算高，申請人只須持有本港頒授嘅學位，喺綜合招聘考試能力傾向測試及格，同綜合招聘考試中、英文攞到二級成績就得。影視處指呢個職位毋須工作經驗，即係應屆大學畢業生都可以應徵。
政府最近將公務員3+3（3年試用加3年合約）入職制度取消，改為只需完成3年試用就可以轉長工，令到呢份筍工筍上加筍，難怪招聘廣告甫出街，即時引起網民哄動，好多人估計勁多人入表，因為入職條件唔高，即使減咗兩個起薪點都冇所謂，當買六合彩博一博囉！
八方提醒大家，呢份工本月20日截止申請，查詢電話：25945874。
mailto:[email protected]