人工對好多香港打工仔嚟講，可能係非常敏感嘅話題。但好多球星嘅波糧，就未必係咩大秘密，《米蘭體育報》啱啱就公開咗今季20支意甲球隊球員嘅年薪。當中以新任意甲打工皇帝伊巴謙莫域為首嘅AC米蘭，就有5位球員入選最高人工11人陣容。人哋話AC嘅總理班主貝盧斯科尼孤寒，家陣睇嚟又真係唔多似！
《米蘭體育報》日前喺頭版登咗意甲各隊最高人工嗰25位球員名單出嚟，又列晒每隊年薪總支出，仲砌埋個最富貴11人陣容。伊巴謙喺西甲人工榜屈居C朗之後，由巴塞借去AC減咗少少人工，不過原來900萬歐元（約8,900萬港元）年薪已夠佢做意甲No.1大富翁，計番更多過晒升班馬切塞納全隊成年人工830萬歐元有突。
法米尼坐冷板袋高薪
伊巴謙嘅球會新隊友朗拿甸奴、派路同尼斯達，都係高薪一族，每年人工有成450萬至750萬歐元不等。而中場法米尼因為佢當年免費由阿仙奴加盟，變相獲得450萬歐元年薪嘅合約，但佢加盟一直只係後備，值唔值就見仁見智。AC老闆貝盧斯科尼近年集中搞政治，雖然冇乜泵水畀隊波買超級球星，隊波打咩戰術用咩人又指指點點，不過佢對越嚟越貴嘅球隊人工支出都算有承擔，我求大俠起碼冇聽過AC出現類似巴塞上季尾球員到期冇糧出嘅欠薪事件。
啱啱喺歐國盃外圍賽梅開二度，帶領瑞典大炒聖馬力諾6蛋嘅伊巴謙踢AC掂唔掂，求大俠唔敢講，不過AC今季用超過1.3億歐元喺球員人工之上，佔球會總收入成68%，對營運嚟講真係唔多健康，亦唔怪得前排猛傳AC想搵細哨開刀，密謀減佢一半人工啦！