要做中國P&G，談何容易！霸王集團（1338）上市前已經通佈天下要搞凉茶及護膚品，快快手整埋個廣東省嶺南中藥文化遺產保護名錄批審委員會通過認定嘅「中藥世家」認證，呢個認證機構究竟有幾權威，從佢用咗只係短短一個月時間就完成對陳氏族譜及其超過50年或4代傳承嘅考證就知一二。
管理層口口聲聲話內地凉茶市場大到有250億元，但根據《中國證券報》嘅調研資料顯示，09年整個中國內地市場規模係170至180億元，而當中80%份額已經俾紅罐王老吉飲晒，人家仲唔使用代言人，只係用咗一個夠貼心嘅Rock版廣告歌，足以令個180年品牌年輕晒。
2003年一場沙士提升消費者對健康關注，銷售額就由02年嘅1.8億元大增至08年105億元，連可口可樂在內地都係紅罐王老吉嘅手下敗將。當然，去年係王老吉感覺挫敗嘅一年，因為夏枯草事件（有消費者因長期飲用含夏枯草成份嘅王老吉而出現胃潰瘍），競爭對手和其正、春和堂、上清飲、萬吉樂、寶慶堂、霸王、順牌、潘高壽、鄧老、青春寶及娃哈哈紛紛眼紅症發作，乘機出怪招突圍，積極進軍凉茶飲料市場。
王老吉涼茶代名詞
霸王唔係無出路，就係要正正經經做番好自己本份，唔熟就索性收購人家已經做起嘅同類業務連品牌算啦，總好過諗做衞生巾或者妄想自己可以代替已經成為凉茶代名詞嘅王老吉。收購可以係一個好嘅多元化橫向拓展策略，不過就要好小心，唔好俾經紀擦鞋仔呃，瑞士及法國有大把護膚品保健品嘅研究所實驗室，好多產品都已取得歐盟認證，有朋友手上就有一隻由單車王子做代言人嘅外用紓緩啫喱，內地好多大人物都一箱箱訂購，產品只有香薰等天然物質，呢個只係其中一個例子，霸王要淡化二噁烷事件兼洗底，其實就係要行呢條路線。
胡孟青
作者為獨立股評人