球壇瞬息萬變，曼聯老將傑斯（圖）早排先話踢番威爾斯國家隊有得諗，家陣真係諗到頭都爆。事關威爾斯足總今日將會開記者會，宣佈國家隊領隊陶錫克嘅去留，陶錫克真係唔撈嘅話，威爾斯好可能接受陶錫克嘅推薦，搵傑斯一邊踢曼聯一邊教威爾斯。如果傑斯真係得到各方都同意應承踢而優則教，呢個真係連我求大俠都未聽過嘅球壇奇聞。求大俠都認同傑斯以前喺曼聯青年軍恩師夏里遜所講，做領隊要四圍去觀察自己球員同對手表現，傑斯佬真係好難分身踢住教。更有傳傑斯可能短期內宣佈掛靴教波，但求大俠可以借金句王桂神把口講：「呢個機會真係得兩個，就係冇乜同微乎其微！」