走在中環鬧市，方亮瑜（Jade）與一般OL無異：一頭長曲髮、一襲連身裙，挽一個時款名牌手袋。直至她拿出了一個羅庚，在街上左看右看，你會發現，她其實是一位風水師。就像皮鞋可以是風筒，風筒卻是鬚刨一樣；靚女，為甚麼不可以是風水師？
31歲的Jade，德望中學畢業後，以第一志願入讀香港大學文學院，主修繙譯、副修法文。念繙譯的人，卻以風水術數謀生，太耐人尋味了。「我媽媽好鍾意玄學，仲去學埋八字，個個月都會將啲傢俬調嚟調去，成屋都係水晶，搞到我好細個已經對紫微斗數好有興趣。」
放棄教職全情投入
Jade的母親不時拿她的八字予堪輿學家及鐵板神術左算右算，「但我一直以嚟都覺得唔係好準」。求人不如求己，最終決定自學玄學，拿着術數家的書自修。朋友知她學玄學，紛紛送上八字要她指點迷津。初期開命盤，半個鐘才有結果，她嫌不夠效率，03年與友人研發了電腦開命盤程式，「一入啲時辰八字，就即刻會有結果出嚟」。
同年她辭去了教師工作，全職當上風水術數家，在網上招攬生意。當時30歲不到，「年輕」竟成為了包袱，初入行經常被挑戰：「你咁後生，有冇料到o架？」「我就會同佢講，慧根同年齡唔係成正比o架喎。當佢哋試過，覺得好準，就會同人講呢個o靚妹唔係冇料到。」
正撰寫英文風水書
「有人試過質疑我係咪錯o架。」話說一位男子，去年年中與女友分手，找Jade問津，Jade告知即將「紅鸞星動」。「個男人話有乜可能咁快呀，仲同朋友講，話我流流哋。」結果他在今年2月結婚，與新女友由拍拖到拉埋天窗，前後只短短兩個月，「之後佢話好信囉」。
異性相吸，Jade的顧客以男士居多，而且大多數是中區金融財經界人士，「佢哋通常都係問事業，早排股市唔係咁好，佢哋就會問嚟緊個市點樣，如果係差，就要節衣縮食、唔去旅行、唔好買咁多嘢，好緊張o架」。
女性顧客通常問姻緣、丈夫有否外遇及仔女能否入讀Band1學校。單身的她笑稱：「幾時有姻緣，我自己都知道，因為自己算過邊個月會行桃花運。」每次拍拖，她都會算一算與男友的八字「夾唔夾」，但純粹為興趣，不會因「唔夾」而放棄一段姻緣。「有時都知道嗰個唔係我丈夫，會冇結果，但都會一齊，唔會連試都唔試，因為咁樣係逆天而行，有時個天係想你去經歷過，先學識一啲嘢。」
她正撰寫英文風水書，希望將中國傳統智慧發揚光大。「其實好多外國人都好信風水o架。」最近她入了自由黨，自言對政治一直無甚興趣的她，因為政改起錨而激勵自己要在政界起錨。「政制有新發展，我都覺得係時候行出嚟。」她說與自由黨理念相近，重視自由民主、公平競爭及法治，「做事手法又冇咁激進，溫和啲，唔會好似其他黨咁有好多憤青，大部份黨員都係well-educated。」
雖然Jade說是否參選言之尚早，「但有咁嘅機會嘅話，都會去試吓。」加入自由黨前，有沒有算過自由黨氣數？她堅稱絕對沒有，「因為唔使算，都知個黨有前途啦」。記者 許偉賢