馮仁昭四圍超：浪漫賀結婚7周年
詩詩、子丹互贈iPhone4心有靈犀 - 馮仁昭

汪詩詩、溫碧霞、莊思敏及楊洛婷等噚日盛裝出席中環「AmarantineSpa水療中心」開幕，王敏德同太太馬詩慧就以平面廣告主角喺現場主禮。
汪詩詩啱啱陪老公甄子丹去完威尼斯影展，仲喺當地慶祝埋結婚7周年紀念日，佢話：「我哋喺一間好浪漫同好出名嘅意大利餐廳食飯，老公因為好忙冇時間買禮物，佢知我一直想換電話，臨走嗰日佢因為等助手去攞部iPhone4，差啲miss咗班機，不過都好sweet。」

溫碧霞為養子推戲

原來詩詩又係買咗同一樣禮物送畀老公，佢話：「我拎自己買嗰部電話影老公，佢都唔明，幾搞笑，真係心有靈犀。」詩詩話同老公冇7年之癢，但真係好耐未試過拍拖喎！佢話冇小朋友喺身邊可以飲少少酒，又話喺威尼斯最擔心香港嘅仔女，日日上網打電話返屋企。
溫碧霞之前收養咗養子何國倫，佢話為咗專心照顧，已經推咗一部戲，不過之前接落嘅5個廣告，就逼住要今個月拍。佢又話唔少人想搵佢兩母子拍廣告，但佢都推晒，佢話家好滿足。莊思敏話隆胸後，起碼有10個女朋友好奇摸佢個胸，嚟緊仲會幫隆胸間美容院拍廣告，到時會着泳衣騷身材。