為咗鼓勵學生尊師重道，表揚好老師，政府有個行政長官卓越教學獎，每年一度頒發，不過呢個獎只係頒畀中小幼教師，多年來都唔「侵」大學教授玩，教育局顧此失彼多年，教資會今年卒之做嘢，主席查史美倫噚晚宣佈，設立「教資會傑出教學獎」，嘉許八大院校中有好表現嘅教師。
為隆重其事，呢個獎項交由資深教授高彥鳴負責籌備，佢透露部份評審準則，就係除咗教書，能唔能夠提升大學教學質素都係好重要因素，所以呢個獎嘅遴選要求、競爭程度會定得相當高，目的係令個獎更有份量。呢個「香港第一教授獎」嘅細節，好似提名、獎金、獎品等仍在討論階段，詳情稍後公佈。