有咁上下機齡嘅機迷，應該都聽過1995年首次登場嘅《FrontMission》！今次系列新作《FrontMissionEvolved》由戰略遊戲演變成動作射擊遊戲，依然着重戰略性同故事性，搭乘自行改裝嘅Wanzer裝甲，改裝自由度極高，手腳身體背包都可以隨意換裝，感覺砌模型一樣！
文：阿洛
全球機械人 大混戰
對上一集已經係2005年嘅事，並且是由上世代舊主機PS2上推出，名為《FrontMission5ScarsoftheWar》。
今次新一集《FrontMissionEvolved》已籌備5年！故事性強，劇情交代時嘅播片質素亦頗高，最新公佈一段男女主角戰火中準備嚟個深情一吻，極浪漫。故事背景係2171年嘅地球，世界各國不同地區發生多場戰役，而百幾年後嘅軍事設備，已由坦克、飛機，轉化為Wanzer機械人；故事模式中，主角們被蔓延到美國的戰火牽連，發生一連串戰場上嘅友情、愛情故事。
紅彗星 倍速上身
作為第三身機械人動作射擊遊戲，對於玩家嘅操控會有一定要求，即係操作都相當複雜；不過如果你唔係資深機迷，廠方亦都準備咗簡單模式，將操作簡化、更易上手。而主角操控嘅Wanzer仲有特殊嘅E.D.G.E.系統，只要發動系統，周遭嘅景象會變成慢動作，有玩開第三身射擊遊戲嘅機迷應該唔會陌生，只不過今次主角換咗係駕駛機械人；慢動作下可以避子彈大炮，同時亦可對敵人作快速反擊，人人都可以感受紅彗星三倍速嘅快感。
重裝備 重口味
講到最吸引，就一定係Wanzer嘅個人化改裝；除咗各部位嘅顏色可以自行塗裝外，就算細部件裝備都可以有唔同顏色。加上身體、雙手、雙腳、背包等五個部位，都各有不同配備；好似單手用嘅武器就有機關槍、散彈槍、拳套、電熱鞭、長槍、盾牌等，而雙手用嘅就有來福槍、火箭炮，配合架設在膊頭嘅飛彈、火箭炮、榴彈炮、連發機關槍；重口味啲成身炮又得，驚死嘅加個盾又得。不過重火力當然有利有弊，裝備多了、移動就會變得慢，所以機體配件嘅平衡性，對遊戲嘅戰略性會有好大影響。既然裝備咁個人化，砌好隻模型當然想Show俾人睇，遊戲支援最多8人對戰模式，有個人對戰、團隊戰、搶旗仔等玩法。
遊戲開發︰SQUAREENIX
類型︰動作
遊戲平台︰PS3/XB360/PC
遊戲人數︰1-8人
推出日期︰9月16日
