老實講，香港美食天堂嘅美譽，相信有部份都要歸功於台灣同胞，好似開到成行成市的珍珠奶茶、甚麼麪線等，總之一多人排隊的食肆，就會引入香港。所以今次專程飛去台北，睇吓最update嘅美食排隊指數。
記者、攝影：蕭漢祥
鳴謝：港龍航空
Walk-in等兩粒鐘
搵食，幾時都係跟大隊最好最穩陣，今次就跟住地道台灣人去搵食。
最近有一間吐司店，可以話係風靡全台北，於網上討論區、報章和電視節目如《康熙來了》都成為熱話。究竟排隊指數有幾誇張？負責網上市場發展的魏小姐表示：「我們每個月的16號，都會開放下個月的預訂限額，但不出三日就會訂滿。至於可否walk-in排隊品嚐，唔係話唔得，但一般都要在門外等個半至兩小時。」係咪咁誇張呀！的確正午12時開門營業的吐司店，小記於早上11時到場採訪，不過去到門外已有十多人等候，一身女僕look的侍應為免排隊人龍過長，不時在門外為客人登記，讓他們分批入場。正式開門後，不足5分鐘就全場爆滿，門外仲排緊隊，果然強勁！
食前先影相
點解咁吸引？首先單睇各款蜜糖吐司觀賞度極高的賣相，已經收買了不少台灣女生的芳心，店內大家做的第一件事，係為吐司拍照留念。再者用料方面，用上各種美味的雪糕、鮮果、甜餅和奶油等等，絕對即時引起大家食慾。雖然採訪時是中午，但相信有很多食客並非為了午飯而來，因為大家點選的第一道菜都是蜜糖吐司，原因係一個吐司的份量大到可以唔使食晏。雖然呢間店開業不久，但佢哋嘅吐司已經研發到第三代。魏小姐稱第一代的吐司如「就愛草莓」，入面加了果糖粉，整體感覺較甜。到第二及第三代的朱古力嘉年華等，棄用果糖粉配合材料的甜味，令吐司味道恰到好處，甜味得到平衡。
a.DazzlingCafe（MINT2店）
地址：忠孝東路四段248巷3號
睇排行榜 食亞軍魚卵
其實除咗新店排隊排餐飽之外，好多人都同樣鍾情於台北老店。好似高家莊米苔目，開業30年都係晚晚高朋滿座，好多人OT完、消遣完都要嚟食消夜。老闆高先生話，主打當然係米苔目，眼睇就好似係一碗淨烏冬，睇真？就會發現麪身較烏冬透明，食落亦都會較煙韌，口感似年糕，計落仲要係6港元左右一碗，抵到爛！小店無餐牌，但睇牆上的年度排行榜就知點揀，排第一最多人食的紅燒大腸，我怕膩，選了第2及第3的沙拉魚卵和芥茉軟絲，都是非常地道的冷盤。軟絲即是凍魷魚條配上日式芥辣，感覺真係有啲似日本菜；至於沙拉魚卵，是將魚卵乾製成一片片，然後在上面配沙律醬。講真，呢兩道菜淨食會有啲dry，所以最佳配搭就係米苔目，三樣加埋落樓才$50，唔錯！
b.高家莊米苔目
地址：林森北路279號
成Lit蘋果茶吹一晚水
台北的青少年一大班朋友出去食嘢，食物是否富有特色當然重要，但環境氣氛更加重要。好似位於忠孝東路後街的客棧喝茶，屬於年輕人聚腳地，皆因環境舒服兼啱胃口。呢晚小記叫咗個麻辣鴨血、咖喱可樂餅同辛辣麪，味道並非好特別，但喺香港較難食到，再加上大杯裝飲品約1,000cc，雖然要成$40，不過真係一杯夠你吹成晚水。
c.客棧喝茶
地址：忠孝東路四段181巷7弄13號
網上免費入台證3分鐘OK
以往港人去台灣，要到中華旅行社或在台灣機場辦落地簽證。不過自9月1日起，持BNO或特區護照的港人都可登入台灣入出國及移民署，免費申請入台證，手續簡單，只要填好資料，然後確認及列印表格便可，過程約三分鐘之內完成。小記正是於9月1日改制後首天入境，以下部份大家要留意：於核准後網頁會顯示三個選擇：列印入境及出境登記表、只列印入境登記表及只列印出境登記表。但其實於台灣入境時，當局要你必須同時出示出入境兩張登記表的，即是你少列印任何一張都唔得，否則隨時搞到要喺當地重新搞落地簽證。
網址： https://nas.immigration.gov.tw
MaidCafe
溫馨提示：吐司的鋒芒太露，其實沙冰和可可飲品系列都表現不俗，值得一試。每杯$34-$39
TravelMemo
港龍航空香港台灣來回機票價錢由$2,470起。港龍航空： http://www.dragonair.com
1港元兌4.11新台幣（文中價錢已折算港元）
110V，兩扁腳插座
台灣
台北
下周雷雨，26-33℃
