唔知係咪新嘅銀行贊助商腳頭唔好，利物浦今季真係諸事不順。會方莫財買人、馬斯真蘭奴玩罷踢跳槽巴塞、英超俾曼城大炒、更傳下個月隨時因冇錢還債被接管兼扣9分。咁都未夠黑，球隊主力古積特前日喺荷蘭國家隊練波嗰陣，又無情情演嘢玩倒掛而整傷膊頭，要唞4個禮拜。搞到紅軍喺9月19日硬撼曼聯得番費蘭度托利斯（F托）同「雪條人」賴恩巴布兩個前鋒用，領隊鶴臣真係有排頭痕！
傷膊頭唞4個禮拜
大家唔善忘嘅話，應該記得荷蘭喺世界盃前對匈牙利嘅熱身賽，洛賓無啦啦懶型玩後踭傳球，點知拉傷咗大髀筋，幾乎世界盃都踢唔到；古積特前日跟荷蘭操練備戰周三凌晨對芬蘭嗰場歐國盃外圍賽，唔知佢玩認真定突然洛賓上身，喺接應一個傳中球嗰陣，諗住嚟個單車腳窩利射門，點知失平衡變咗撻生魚，仲要左邊膊頭先落地，搞到要因傷退隊之餘，仲即時要飛返利物浦市再做詳細檢查。聽荷蘭教頭尹馬維克講，古積特之前練波都有玩開倒掛抽射，亦唔明佢今次點解會失手。而經檢驗後，證實古積特傷及頸骨與膊頭之間嘅骱位，需要唞4個禮拜。
今次古積特玩出禍，紅軍真係多得佢唔少，因為領隊鶴臣之前已講過，球隊得4個前鋒根本唔夠用，之前尼高治整親大髀筋復出無期，家陣仲冇埋古積特，即係話啱啱回勇入番波嘅「玻璃腳」F托，若然有乜冬瓜豆腐，就要搵坐多過踢嘅賴恩巴布出嚟掛帥。
硬戰連場鶴臣頭痕
紅軍星期日作客伯明翰，跟住下周中歐霸盃對布加勒斯特星隊，下個星期日仲要作客曼聯，場場都唔易踢，粉絲唔擔心就假。唔怪得鶴臣最近講嘢都好灰，話家陣可以做嘅只係守住隊波，直至新老細上場揼水擴軍，球隊先至有機會爭吓盃喎！