演技太差，都係從政者大忌。日前喺南區薄扶林區議會補選中落敗嘅劉應東，投票日前夕有個助選義工報稱被公民黨司馬文推跌；報警後司馬文被捕。當時公民黨好擔心事件影響選情，點知司馬文大勝。
公民黨黨魁余若薇噚日話，呢兩日打電話向選民謝票時，唔少人提到呢件事都反應極大，猛鬧嗰位「插水」義工「好假」，激發佢哋投票畀司馬文，唔畀呢種低質素選舉行為得逞，相信劉應東都諗唔到會適得其反。
余大狀指公民黨喺五區公投時，喺呢區有900幾票，司馬文今次以1,183票贏出，意味有新票源流入；反觀當年陳岳鵬有1,067票，劉應東只有791票，換言之匯賢冇咗200幾票。