11月17號，香港足球隊已落實喺大球場同巴拉圭踢友賽，賽程fifa.com都出埋。據聞籌備呢場波嘅係巴拉圭國家隊嘅贊助商；巴拉圭30萬美金嘅出場費都係由佢哋出，香港足總只負責港隊嘅開支，可以講係零風險。當然，票房收入就畀晒間贊助商，票價暫時未定。
由於賽事自負盈虧，贊助商好想叫「乳神」莉爾莎列基美（圖）來港宣傳；呢位巴拉圭教母之前已婉拒日本同中國行，不過，我求大俠收到風，佢好似幾like香港，嚟嘅機會好大。
由於世界盃後響晒朵，乳神嘅身價亦水漲船高，幫佢接Job嘅Agent開價6萬美金（約46萬港元）訪港，條數都幾「揦脷」，所以班搞手希望暫時避避乳神風頭，之後再傾時希望可以平啲。