盧海鵬、賈思樂、廖安麗、戚美珍等幾代昔日無綫嘅長壽綜藝節目《EYT》嘅主持，噚晚到將軍澳電視廣播城上《超級遊戲獎門人》節目，不過由於入面有幾位嘉賓都係元老級兼上咗年紀，所以噚晚嘅節目就刻意作出調動，將一啲大動作嘅遊戲取消，改為玩一啲靜態遊戲。
當中最令人懷念就係「蝦仔爹哋」喺節目重聚，佢哋一班《EYT》嘅主持仲不時會相約茶敍，原來隔咗咁多年，賈思樂都仲係習慣叫鵬哥做爹哋。
「會爆肚唔會爆粗」
早年簽約亞視多年嘅鵬哥，隔咗咁多年重返無綫，佢竟然莊重到着晒西裝上陣，鵬哥話佢喺上星期做咗白內障手術，佢搞笑咁話：「冇事嘞，準備身後事啫，係矇到睇唔到嘢先發現，家冇嘢嘞，清楚晒！我着西裝係驚凍，點知仲係咁熱，今日唔會跑同跳，只係猜吓字，我都成70歲啦。」鵬哥仲話一定會爆肚，但就唔會爆粗囉。
此外，廖安麗就話早前幫皈依咗嘅前夫葉青霖間寺廟籌款，仲幫佢哋籌到差唔多130萬㖭。廖安麗話今次一班《EYT》主持重聚真係好經典，佢仲講笑話大家一把年紀身體都有些少損傷，佢話：「好似鵬哥做完白內障手術，余慕蓮啲骨又有事，我就有骨刺。」