開學禮年年有新生參加，浸大今個學年開學禮，校長陳新滋都係「新生」之一。天才兒童沈詩鈞破格入讀浸大，對大學校園生活嘅體會係學生只顧拍拖同打麻雀，對同學咁hea不以為然。
童言無忌，首次主持開學禮嘅陳新滋借題發揮，噚日向新生訓話，指入讀浸大後將步進一個「學習如何學習」嘅新階段，既要適應課堂上「雙向互動」學習模式，也要適應一個高度自由和需要高度自我約束能力嘅學習環境。
陳校長冇話唔好拍拖或者打麻雀，事實上講都未必有人聽，只係好客氣咁講，希望學生可以全方位享受浸大多元化全人教育。浸大噚日同時頒授榮譽大學院士畀陳有慶、劉佐德、魏昭鳳、錢乃駿同伍步功。