中日關係又起波瀾。近排日本挑起火頭，作勢駐軍釣魚台，噚日一艘中國漁船喺釣魚台附近水域，先後同兩艘日本海上保安廳巡邏船相撞，好彩冇人傷亡；中國外交部提出嚴正交涉。保釣行動委員會噚日宣佈，保釣二號隨時起錨宣示主權，政協劉夢熊更表示，一旦日本駐軍上島，佢即時捐出300萬元買艘烏克蘭退役軍艦出海，同蘿蔔頭撼過。
揚言硬撼日艦
唔講唔知，原來劉夢熊係保釣行動歷來最豪爽捐款人，累積捐咗200幾萬元，對於日本近日諸多動作，劉夢熊噚日在記者會嬲到拍枱，指日本趁美韓軍演渾水摸魚，恰中國恰到上心口，「邊個令日本得逞，就係當代李鴻章」。
劉夢熊又聲稱有「軍方消息」，話中央研判日本目前得個講字，如果真係駐軍，中央會有實際行動。佢又呼籲民間集中資源整裝待發，豪情壯語稱會捐錢買艘烏克蘭舊軍艦，同日艦硬撼。全球保釣團體本周六齊集台北，保釣行動委員會成員曾健成稱，如果當地船家肯租船，會即時啟航到釣魚台宣示主權，保釣二號亦可隨時起錨，只要海事處今次唔好再阻撓就得嘞。