是非纏身嘅霸王集團（1338），擺明要化悲憤為力量，實行全方位將「霸王」品牌無限放大。之不過，草本世家嘅應用範疇已令筆者開始擔心，集團會否已因練功過度走火入魔？
最令不知者嚇死而知者笑死嘅，仲係陳主席話考慮經年想推出嘅新產品草本衞生巾。諗得正面啲，主席應該係想玩EmotionalBranding呢張貼心牌，但係唔知呢條橋究竟係佢自己諗出嚟，抑或係由一班成世人都未用過姨媽巾嘅麻甩佬諗出嚟。呢種似乎係未經過詳細市場調查，就攞出嚟見人嘅盲目擴張策略，仲係有前冇後打死罷就嗰隻。
打貼心牌轉移視線
有冇睇過劉青雲同古天樂嗰套《絕世好Bra》吖，兩個大男人除人個Bra扣、彈人條Bra帶就掂啫，叫佢哋正正經經諗吓個設計應該係點就大有難度。須知道呢個唔單止係設計問題，更加要配合人體力學原理，兩個大男人最後咪又係要向女性學習，點樣由愛與關懷出發，即係EmotionalBranding啦。
唔係得啖笑，主席話呢種特種衞生巾可以消炎兼去異味，唔通喺佢眼中，女性經期就等同於發炎同埋有異味？查實有邊位女士會想自己喺最唔方便嘅幾日，俾隔籬左右尤其係班死仔同事索到你有當歸田七等異味呢，唔係個個頂得順中藥味喎。
咁主席可以點拆呢，唔通又話好心幫你補補啫。但係我又真係諗唔到點解連敏感部位都要進補囉，又或者點解要用中藥噏住晒嗰個位置，咁樣唔知會唔會更唔衞生同埋更容易發炎？唔係好明白喎！
查實點先算係一條盡責嘅衞生巾呢？唔會滲漏、吸水力強、乾爽貼身、絕不移位、抗敏感之餘，最緊要係經得起坐低起身包冇問題嘅測試，有料嘅其實唔需要雕花，自亂陣腳轉移視線，幾時都唔係高明嘅危機管理辦法。
胡孟青
作者為獨立股評人