潮模Angelababy由女模跳到拍廣告、電影，昨日更以設計師身份，坐鎮自己的b+abxAngelababy時裝騷。屢被傳整容的Baby，透露月前專登找整容醫生檢查面部，出醫學報告證明自己沒整容、沒加工，白紙黑字駁斥外間指控，稍後更會將報告公開。
潮模Angelababy（楊穎）昨日在又一城出席自己為b+ab設計的系列時裝騷，Baby再次以設計師身份亮相，不需上台行騷，完騷後謝幕時更有模特兒獻花。Baby說：「今日係以designer身份嚟加油，呢個系列我用咗半年時間設計，以sexy為主，首次design，好有新鮮感。」她更笑言在系列加Y字，變成「b+aby」。
「實在太無聊」
Baby近期準備兩部新片，包括一部動作片，她謂媽媽很擔心，但已學懂如何在打鬥中保護自己，更謂不需向黃曉明請教。男友黃曉明近日被指在鞋內加墊增高，Baby說：「我唔覺佢需要囉，呢啲報道唔使理，都冇人咁做，就算有，都係冇乜所謂。」
人紅是非多，Baby近期又被指整容，她昨日透露已為此做了醫學檢查，白紙黑字證明自己沒加工，她說：「實在太無聊，其實我搵咗個醫生檢查塊面，證明冇，將個報告交畀法庭，用嚟做一份證據。」
檢查骨結構
問到詳情，Baby說：「喺個幾月前，搵咗個整容醫生，等佢檢查我塊面有冇呢類（整容後）傷口、啲骨結構係咪有改變過，檢查完，拎啲證據出嚟，等官司完咗，會公開份報告。」黃曉明也常給人指整容，Baby可以將方法向黃曉明分享，她說：「唔使啦，我實在係俾人哋講得太過離譜，先要咁做。」
採訪：MaKinWah
攝影：DickyChan