深圳特區成立30周年，胡總超高規格接見李嘉誠一個，即刻引起港九新界全個特區無限聯想，大家起勢分析箇中玄機，又猛咁拆解曾被指喺內地失勢嘅誠哥點解再受榮寵。胡總呢一見，大家更清楚香港邊個話事，煲呔自然冇癮，但唔知江湖傳聞同誠哥「熟啲」嘅梁振英，會唔會私下竊喜呢？
曾傳梁振英拜會誠哥
可以想像，嚟緊香港特首跑馬仔估領袖呢個遊戲，「誠哥點睇」又會成為重要參考資料。有個講法係，梁振英去馬選特首得到誠哥、恒隆陳啟宗等地產商支持，唐唐就同新地、恒基關係好啲。
大家可能仲記得，舊年傳出梁振英曾拜會李嘉誠，喺飯局上表明佢選特首嘅心迹，希望得到首富嘅祝福。事後，記者行家喺長和系業績記者會上問誠哥呢單嘢，誠哥回答時冇否認見過梁振英，佢亦梗係唔會講明支持邊個，只係訂出兩項特首條件，一係要得到中央同香港人包括佢嘅「信任」，二係要能力「勝任」，到今年記者會誠哥都仲係咁講，但就加多句話唔係淨係睇今時今日嘅表現，而係要睇埋往績。
呢啲睇落類似阿媽係女人嘅條件點樣詮釋，真係可以言人人殊各自表述，但政經界早有傳言，唐唐同梁振英兩者之中，誠哥同後者熟啲。大家可能會話，家香港有仇富仇商情緒喎，咁梁振英得到首富祝福係咪好事呢？但梁振英係非常醒目嘅人，你睇佢支持復建居屋同最低工資嘅立場就知。
跑馬仔仲有好多變數
講到尾，政治上一日都太長，特首跑馬仔自然仲有好多變數，亦牽涉背後不同陣營嘅角力。對於呢個小圈子遊戲，八方同大部份香港人一樣，只有剝花生嘅份兒，大家即管放長雙眼睇吓，誠哥嚟緊仲會唔會開出乜嘢特首人選新條件，到時睇吓究竟係唐唐看高一線，定CY先係真命天子。
mailto:[email protected]