唔好睇小Noah呢架麪包車，其實佢近年已成功揮低七人車強敵，成為MPV銷量冠軍。有機會同王者相處幾日，當然要慢慢感受一下全新VALVEMATIC引擎有幾好，當你揸上手數分鐘，就即刻Feel到畀油即去、轉波即上的感覺，連靚女媽咪都邊揸邊喊：「爽爆呀！」
記者：許維雅
攝影：梁細權
Model：Eagle、Betsy
去Shopping：
方匣子車形予人日本化年輕MPV的感覺，最得年輕家庭歡心。
去教堂：
七人車有電尾門會方便好多，靚媽唔使大大力關門咁失儀。
配備實用不花巧
每次有機會借車做長測，其實都好樂意試揸七人車，因為去邊度玩都可多載幾個朋友，空間夠大夠闊，去遠啲都唔會話屈住咁辛苦，而今次試揸的是外形感覺較年輕、啱晒我口味的2010年新版Noah。既然大受年輕家庭歡迎成為近年MPV銷量冠軍，要切切實實感受Noah的好處，必須以年輕媽媽角色投入呢次5日的長測之旅。
實用配備逐格睇
電控側門
經常載住小朋友周圍去，電控趟門的確是不可或缺，即使我坐在司機位，亦可以幫囡囡輕鬆關門。
廣角鏡
囡囡無時停，既要專心揸車，又要望實她的一舉一動，頭頂上方的廣角鏡果然貼心實用，仲有增加司機跟乘客溝通的作用。
轉動中排椅
雖然中排座椅有180度迴旋功能，但每次上落都要手動轉向，所以比較懶得運用；不過若然等老公放工，靈活多變的車廂空間就方便我同囡囡邊玩邊消磨時間。
媽媽評價
除以上設備，智能車匙、恒溫冷氣、電尾門等設備，實用不賣弄花巧，廿幾萬車價的確好抵玩。
首款車換上新引擎
新一代媽咪揀選七人車，其實都是想用來返工湊女作代步之用，不求馬力但求慳油。兩公升引擎所輸出的158匹馬力，足剛好應付坐滿一家大細的重量。假日FamilyDay路途遙遠，油耗每公里只需$1.1左右已算不俗，除了環保節能ECO模式於開車時會自行啟動協助慳油，豐田全新研發的VALVEMATIC引擎更是功不可沒。Noah是首架換上新引擎的車款，緊接的有Wish，新偈陸續取代舊有引擎，當然要認真體驗一下。
媽媽評價
用個「爽」字來形容行車表現就最貼切不過，引擎反應之快帶來操控輕鬆的感覺，加埋舒適的軚感、睇位容易的高車身，即使新手亦能操控自如。若果有埋免提藍芽裝置就當然更佳啦!
Noah規格
引擎： 1,987cc直四DOHCVALVEMATIC
馬力： 158PS/6,200rpm
扭力： 196Nm/4,400rpm
傳動： 七前速無段變速自動波連+/-
售價： $286,854（七座）
查詢： 23054555（皇冠車行）
