何秀蘭（阿Cyd）初出道時同卿姐係孖寶，卿姐過檔去民主黨時，都問過呢位好姊妹有冇興趣，但阿Cyd都係鍾意自由身多啲，所以婉拒卿姐嘅邀請，但兩人仍然保持良好關係，不時約埋一齊睇戲。阿Cyd噚日講起有套戲好睇兼好笑，但卿姐死都唔肯同佢一齊去睇，唔係因為呢套戲色情或者暴力，只係因為粗口多，講緊嘅，係早前票房口碑算唔錯嘅港產片《志明與春嬌》。
阿Cyd話，最初想約卿姐睇呢套戲時，卿姐冇乜抗拒，但一提到戲中有唔少粗口對白，卿姐即時耍手擰頭，睇嚟卿姐對粗口呢樣嘢嘅態度真係始終如一好堅定。而阿Cyd對上一套同卿姐一齊睇嘅戲，就係《阿凡達》，兩位觀眾都好滿意喎。